ថ្មីៗនេះ បានរឿងរ៉ាវដ៏គួរឱ្យហួសចិត្តមួយបានកើតឡើងក្នុងប្រទេសចិនដោយមានក្មេងស្រីម្នាក់ ទៅលួចគ្រឿងអលង្ការរបស់ម្ដាយដែលមានតម្លៃរហូតដល់ ១ លានយ័ន (ប្រមាណជាង ១៣ ម៉ឺនដុល្លារ) ទៅលក់ក្នុងតម្លៃត្រឹម ៦០ យ័ន (ប្រមាណជាង ៨ ដុល្លារ) ព្រោះតែមិនដឹងថាគ្រឿងអលង្ការនោះមានតម្លៃថ្លៃខ្លាំងបែបនេះ។
តាមសារព័ត៌មាន South China Morning Post បានឱ្យដឹងថា ក្មេងស្រីខាងលើបានលួចគ្រឿងអលង្ការទាំងនោះក៏ព្រោះតែនាងចង់លក់យកលុយទៅទិញក្រវិល និង ចោះក្រវិលមាត់។ ក្រោយដឹងថាគ្រឿងអលង្ការខ្លួនឯងបានបាត់ ម្ដាយរបស់ក្មេងស្រីរូបនោះក៏បានទៅដាក់ពាក្យប្ដឹងប៉ូលិសទើបរកឃើញថាតាមពិតចោរដែលលួចគ្រឿងអលង្ការរបស់នាងនោះគឺជាកូនស្រីបង្កើតរបស់នាងសោះ ដោយបានលួចសុទ្ធតែខ្សែដៃខ្សែកធ្វើពីគជ់ និង ថ្លើមថ្មមានតម្លៃៗ។
តាមឱ្យដឹង ក្មេងស្រីជាកូនគឺមិនដឹងថាគ្រឿងអលង្ការទាំងនោះមានតម្លៃថ្លៃម្លឹងនោះឡើយដោយនាងគិតថាជារបស់ក្លែងក្លាយ ទើបយកទៅលក់នៅហាងទិញរបស់មួយទឹកនៅផ្សារក្នុងតម្លៃថោកខ្លាំងបែបនេះតែម្ដងទៅ។ តាមសម្ដីស្ត្រីជាម្ដាយប្រាប់ទៅប៉ូលិសបានរៀបរាប់ថា៖ «ខ្ញុំអត់ដឹងថាហេតុអីបានជាកូនខ្ញុំចង់លក់គ្រឿងអលង្ការទាំងនោះទេ។ គេបានប្រាប់ខ្ញុំថាគេត្រូវការលុយនៅថ្ងៃនោះ ហើយពេលសួរទៅថាត្រូវការប៉ុន្មាន នាងក៏ប្រាប់ខ្ញុំថា ៦០ យ័ន (ប្រមាណ ៨ ដុល្លារ)។ ខ្ញុំសួរទៀតយកលុយធ្វើអី ហើយកូនក៏តបថា គេឃើញអ្នកចោះក្រវិលនៅនឹងមាត់មើលទៅស្អាតទាក់ទាញ ហើយក៏ចង់ចោះតាមគេដែរ។ នាងថាក្រវិលមាត់នោះបើចោះអស់ថ្លៃប្រមាណ ៣០ យ័ន (ប្រមាណ ៤ ដុល្លារ) ហើយគេនឹងឱ្យនាងក្រវិលមួយគូទៀតក្នុងតម្លៃ ៣០ យ័នទៀត អ៊ីចឹងទាំងអស់សរុប ៦០ យ័ន»។
ជុំវិញរឿងរ៉ាវនេះ ខាងប៉ូលិសក៏បានជួយអន្តរាគមន៍ទាក់ទងជាមួយខាងអ្នកគ្រប់គ្រងផ្សារ និង យកបានគ្រឿងអលង្ការទាំងនោះឱ្យម្ចាស់ដើមវិញបានផងដែរ៕
ប្រភព៖ World Of Buzz
