សារព័ត៌មាន Dailystar បានចេញផ្សាយករណីដ៏ហួសចិត្តខ្លាំងមួយនៅប្រទេសឥណ្ឌា ដោយមានគូស្នេហ៍វ័យក្មេងមួយគូនៅក្រុង Aligarh រដ្ឋ Uttar Pradesh ត្រៀមចូលរោងការនៅថ្ងៃទី ១៦ ខែមេសា ធៀបការចែកអញ្ជើញភ្ញៀវ ញាតិមិត្តបងប្អូនរួចរាល់អស់ហើយ បែរជាមកជួបរឿងនឹកស្មានមិនដល់ធ្វើឱ្យកូនក្រមុំឈឺចិត្តសឹងក្អួតឈាម។
កូនកំលោះមានឈ្មោះ Rahul និង កូនក្រមុំឈ្មោះ Shivani ដោយរឿងហេតុកើតឡើងដោយសារតែកូនកំលោះបានពង្រត់គ្នាជាមួយ Anita ដែលជាអនាគតម្ដាយក្មេក និង ត្រូវជាម្ដាយបង្កើតរបស់ Shivani។ លើសពីនេះទៅទៀត ទាំងគូនោះថែមទាំងបានលួចលុយសន្សំរបស់គ្រួសារទៅអស់ ទុកឱ្យកូនស្រី និង ប្ដី គ្មានលុយមួយសេនសល់តែសំបកខ្លួន។
ហេតុការណ៍ខាងលើនេះដែរកើតមានឡើងកាលពីថ្ងៃទី ០៦ ខែមេសា ឆ្នាំ ២០២៥ កន្លងទៅ ដោយ Rahul បានចាកចេញពីផ្ទះ ហើយប្រាប់ថារូបគេចេញទៅទិញឈុតរៀបការ។ នៅយប់នោះ រូបគេបានទូរស័ព្ទទៅឪពុករបស់ខ្លួនដោយប្រាប់ថាគេចេញក្រៅហើយ មិនបាច់រកគេទេ។ ក្នុងពេលជាមួយគ្នានោះដែរ Shivani ដែលជាកូនក្រមុំ ក៏ចាប់អារម្មណ៍ថាម្ដាយរបស់ខ្លួន ហើយនឹងលុយសន្សំក៏បានបាត់ស្រមោលទៅដូចគ្នា។
តាមពិតទៅ ទាំង Shivani និង ឪពុកនាង បានចាប់អារម្មណ៍ដឹងហើយថា ទំនាក់ទំនងរវាង Rahul និង Anita គឺប្លែកខុសពីធម្មតា ប៉ុន្តែដោយសារតែមិនចង់ឱ្យប៉ះពាល់ថ្ងៃរៀបការឆាប់ៗ ទើបពួកគេមិននិយាយអ្វី។
ថ្លែងប្រាប់សារព័ត៌មាន NDTV នាង Shivani បាននិយាយថា ៖ «ខ្ញុំគ្រោងនឹងរៀបការជាមួយ Rahul នៅថ្ងៃទី ១៦ មេសា តែម្ដាយខ្ញុំបានពង្រត់គ្នាជាមួយគាត់នៅថ្ងៃទី ០៦ ខែមេសា។ Rahul និង ម្ដាយខ្ញុំ តែងនិយាយទូរស័ព្ទជាមួយគ្នាញឹកញាប់ក្នុងពេល ៣ ទៅ ៤ ខែនេះ។ ម្ដាយខ្ញុំលួចយកលុយទាំងអស់របស់គ្រួសារយើងទៅជាមួយ។ ឥលូវ គាត់ចង់ធ្វើអីធ្វើទៅ ពួកយើងអត់ខ្វល់ទេ។ អ្វីដែលពួកយើងចង់បានគឺលុយ និង គ្រឿងអលង្ការរបស់យើងត្រឡប់មកវិញប៉ុណ្ណោះ»។
ខាងក្រុមគ្រួសារបានរាយការណ៍រឿងហេតុនេអទៅកាន់ប៉ូលិស ដោយប្រកាសរកមនុស្ស និង ស៊ើបអង្កេតលើករណីលួចយកទ្រព្យសម្បត្តិ៕
