ថ្មីៗនេះ ក្រុមគ្រូពេទ្យនៅមន្ទីរពេទ្យ Xindu Traditional Chinese Medicine នាក្រុង Chengdu ប្រទេសចិន បានរាយការណ៍ករណីដែលកម្រនឹងកើតមានមួយលើអ្នកជំងឺក្នុងតំបន់ម្នាក់។ អ្នកជំងឺជាស្ត្រីវ័យ ៤៨ ឆ្នាំ ដែលជួបបញ្ហាបាក់ឆ្អឹងដោយគ្រាន់តែរមៀលខ្លួនលើគ្រែដេក។
តាមការរៀបរាប់ពីលោកវេជ្ជបណ្ឌិតម្នាក់ឈ្មោះ Long Shuang បានឱ្យដឹងថា តាមរយៈលទ្ធផលតេស្តពិនិត្យលើអ្នកជំងឺបានបង្ហាញថា កម្រិតវីតាមីន D ក្នុងខ្លួនស្ត្រីខាងលើគឺធ្លាក់ចុះខ្លាំងមែនទែនបណ្ដាលឱ្យឆ្អឹងឆាប់ចុះខ្សោយកាន់តែលឿន និង បង្កទៅជាជំងឺពុកឆ្អឹងធ្ងន់ធ្ងរ។ ការពិនិត្យបន្ថែមបានបង្ហាញឱ្យឃើញទៀតថា អ្នកជំងឺគឺតែងតែការពារខ្លួនមិនឱ្យត្រូវពន្លឺព្រះអាទិត្យតាំងពីក្មេង ដោយរូបគាត់កម្រស្លៀកពាក់ខ្លី និង តែងតែប្រើប្រាស់ឡេការពារកម្ដៅថ្ងៃជានិច្ចរាល់ពេលចេញក្រៅ។ ករណីមួយនេះដែរ ខាងក្រុមគ្រូពេទ្យក៏បានលើកមកជាការណែនាំព្រមានដល់មនុស្សមួយចំនួនដែលចូលចិត្តប្រើប្រាស់ឡេការពារកម្ដៅថ្ងៃច្រើនជ្រុលផងដែរ។
លោក Jiang Xiaobing ប្រធាននាយកដ្ឋានផ្នែកវះកាត់ឆ្អឹងកងខ្នងប្រចាំមន្ទីរពេទ្យ Second Affiliated Hospital of Guangzhou Medical University បានបញ្ជាក់ដូច្នេះថា៖ «វាមិនចម្លែកទេដែលមនុស្សគ្រប់គ្នាលាបឡេ និង ស្លៀកពាក់ជិតៗពីក្បាលដល់ចុងជើងដើម្បីការពារពីពន្លឺព្រះអាទិត្យនោះ។ យ៉ាងណាមិញ តាមពិតទៅសកម្មភាពបែបនេះគឺមិនល្អចំពោះសុខភាពនោះឡើយ»។
លោក Jiang បានបន្ថែមឱ្យដឹងទៀតថា រាល់ឆ្អឹងក្នុងរាងកាយមនុស្សយើងគឺកកើតឡើងវិញរាល់ ១០ ឆ្នាំម្ដង ប៉ុន្តែចាប់ពីអាយុ ៣០ ឆ្នាំឡើងទៅ ម៉ាសឆ្អឹងរបស់យើងក៏ចាប់ផ្ដើមបាត់បង់បន្លោះពី ០.៥-១% ជារៀងរាល់ឆ្នាំ។ ការមិនទទួលបានពន្លឺព្រះអាទិត្យគ្រប់គ្រាន់ និង កង្វះវីតាមីន D គឺនឹងធ្វើឱ្យរារាំងដំណើរការទទួលយកជាតិកាល់ស្យូមដែលនាំឱ្យការស្រូបយកជាតិកាល់ស្យូមមានការធ្លាក់ចុះ។
បើទោះជាឡេការពារកម្ដៅថ្ងៃ ឬវិធីសាស្ត្រការពារពន្លឺព្រះអាទិត្យដទៃផ្សេងទៀតមានគុណប្រយោជន៍មួយចំនួនដូចជាបញ្ចៀសហានិភ័យកើតមហារីកស្បែកក៏ពិតមែន ប៉ុន្តែការដែលប្រើប្រាស់របស់ទាំងនោះលើសកម្រិតក៏វាអាចបណ្ដាលឱ្យមានបញ្ហាសុខភាពធ្ងន់ធ្ងរដូចគ្នា។ ចង់បញ្ជាក់ដែរថា ពន្លឺព្រះអាទិត្យគឺសំខាន់សម្រាប់រាងកាយក្នុងការសំយោគយកវីតាមីន D ដែលជាសារធាតុសំខាន់ធ្វើឱ្យឆ្អឹងរឹងមាំ និង ជំនួយដល់ការស្រូបយកកាល់ស្យូម។ ការបញ្ចៀសខ្លួនឯងពីការប៉ះពាល់ពន្លឺថ្ងៃក្នុងរយៈពេលយូរអាចបណ្ដាលឱ្យប្រព័ន្ធភាពស៊ាំ និង សុខភាពឆ្អឹងចុងខ្សោយ៕
