អ្នកវិទ្យាសាស្ត្របានរកឃើញថា ការចូលរួមការប្រគំតន្ត្រីឱ្យបានម្ដងរាល់ ២ សប្ដាហ៍គឺអាចជួយបង្កើនអាយុរំពឹងទុករបស់យើងបានរហូតដល់ទៅ ៩ ឆ្នាំឯណោះ ដោយសារតែឥទ្ធិពលវិជ្ជមាន និង អារម្មណ៍សប្បាយដែលទទួលបាន។
ការសិក្សានោះដែរធ្វើឡើងដោយក្រុមហ៊ុនផ្ដល់សេវាទូរគមនាគមន៍នៅអង់គ្លេស O2 និង ដឹកនាំដោយលោក Patrick Fagan អ្នកជំនាញផ្នែកវិទ្យាសាស្ត្រអាកប្បកិរិយា និង ជាសាស្ត្រាចារ្យរងប្រចាំមហាវិទ្យាល័យ Goldsmith ដោយរកឃើញថា ការចំណាយពេលទៅមើល concert ត្រឹមប្រមាណ ២០ នាទី គឺអាចជួយឱ្យអារម្មណ៍សុខុមាលភាពរបស់មនុស្សកើនឡើងរហូតដល់ ២១%។
បន្ថែមពីនេះ ការសិក្សាខាងលើក៏បានរកឃើញការស្រាវជ្រាវជាច្រើនផ្សេងទៀតក៏លើកឡើងចំៗពាក់ព័ន្ធនឹងកម្រិតខ្ពស់នៃសុខុមាលភាពជាមួយនឹងការកើនអាយុរំពឹងទុកដល់ ៩ ឆ្នាំផងដែរ។ ក្នុងការសិក្សានោះ ធ្វើឡើងតាមរយៈការតេស្តលើចិត្តសាស្ត្រផ្ទាល់ខ្លួន និង ចង្វាក់បេះដូង ដែលធ្វើឡើងអំឡុងពេលចូលរួមសកម្មភាពមួយចំនួនរួមមានការទៅចូលរួមការប្រគំតន្ត្រី ការហាត់យូហ្គា និង ការបណ្ដើរឆ្កែដើរលេង។
ជាលទ្ធផលទទួលបាន៖
– ការទៅចូលរួមការប្រគំតន្ត្រីរយៈពេល ២០ នាទីជួយឱ្យសុខុមាលភាពផ្លូវចិត្តអ្នកចូលរួមកើនឡើង ២១%
– ការហាត់យូហ្គាជួយឱ្យសុខុមាលភាពផ្លូវចិត្តកើនបាន ១០%
– ការបណ្ដើរឆ្កែដើរលេងជួយឱ្យកើនបាន ៧%
និយាយរួមទៅ ពេលទៅចូលរួមការប្រគំតន្ត្រី គឺជួយខ្លាំងលើការបង្កើនក្ដីសុខឱ្យខ្លួនឯង ដោយក្នុងនោះរួមមានជួយឱ្យមានអារម្មណ៍ថាខ្លួនឯងមានតម្លៃ ២៥% មានអារម្មណ៍ថាជិតស្និទ្ធជាមួយអ្នកដទៃ ២៥% និង រំញោចផ្លូវចិត្តដល់ទៅ ៧៥%។ បន្ថែមពីនេះ សម្រាប់អ្នកដែលទៅមើលការប្រគំតន្ត្រីជាប្រចាំរាល់ ២ សប្ដាហ៍ម្ដង ឬញឹកញាប់ជាងនេះ តាមរបាយការណ៍រកឃើញថា កម្រិតក្ដីសុខ ភាពរីករាយ ភាពសកម្ម និង ការស្រឡាញ់ខ្លួនឯងគឺមានដល់ទៅ (10/10) ដែលនេះបញ្ជាក់ឱ្យឃើញថា ភាពរីករាយដែលទទួលបានពីការចូលរួមការប្រគំតន្ត្រីគឺពិតជាជួយបង្កើនសុខុមាលភាពផ្លូវចិត្តមនុស្សបានច្រើនពិតប្រាកដមែន៕
ប្រភព៖ World Of Buzz, Mirror
