តាមការសិក្សាថ្មីមួយរបស់ចក្រភពអង់គ្លេសបានរកឃើញថា ៩ ក្នុងចំណោម ១០ នាក់នៃក្មេងៗជំនាន់ Gen Z បានងាកទៅប្រើប្រាស់បណ្ដាញសង្គមរក tips ពាក់ព័ន្ធសុខភាព ជាជាងទៅរកគ្រូពេទ្យ ឬអ្នកជំនាញដើម្បីសួរនាំ។ ក្នុងនោះដែរ ៩១% នៃ Gen Z ដែលទុកចិត្តការចែករំលែកពីគន្លឹះពាក់ព័ន្ធនឹងសុខភាពរបស់ Influencers មួយចំនួន មាន ១ ក្នុងចំណោម ៥ នាក់បានលើកឡើងថាពួកគេទុកចិត្តការណែនាំតាមអនឡាញជាជាងទៅពិភាក្សាជាមួយគ្រូពេទ្យ។ កាន់តែភ្ញាក់ផ្អើលជាងនេះទៅទៀតនោះ ២៨% នៃយុវវ័យគឺងាកទៅរកបច្ចេកវិទ្យាដូចជា ChatGPT ជាដើមក្នុងការពិភាក្សាសួរនាំជុំវិញនឹងសុខភាពរបស់ពួកគេ។
ការស្រាវជ្រាវដែលដឹកនាំដោយផ្សារអនឡាញ Ocado សហការគ្នាជាមួយ Holland & Barrett បានរកឃើញថា ជិត ២ ភាគ ៣ នៃយុវវ័យចង់សិក្សាបន្ថែមពីសុខភាព និង ការថែទាំរាងកាយ តែយ៉ាងណាមិញ ៦១% នៃអ្នកទាំងនោះបានលើកឡើងថាពួកគេបានទៅសុំជំនួយពីប្រព័ន្ធអនឡាញ ដោយក្នុងនោះ ៧២% នៃអ្នករស់នៅក្រុងឡុងដុងបានទៅមើលតាមការណែនាំពី TikTok និង Instagram។ អ្វីគួរឱ្យចាប់អារម្មណ៍ជាងនេះទៅទៀតនោះ ៣២% នៃយុវវ័យទាំងនោះនៅបន្តសាកល្បង trend ល្បីៗដូចជា ការផឹកកាហ្វេ enamas ដើម្បីជួយដល់ការរំលាយអាហារ បើទោះជាពួកគេនៅមិនប្រាកដពីប្រសិទ្ធភាពរបស់វាក៏ដោយ ហើយមួយភាគបួននៃអ្នកទាំងនោះក៏ធ្លាប់រងប្រតិកម្មមិនល្អពីការធ្វើតាម tips អនឡាញនោះដែរ។
គួរបញ្ជាក់ដែរថា trend ល្បីៗដែលពលរដ្ឋអង់គ្លេសព្យាយាមធ្វើតាមរួមមានការផឹកថ្នាំទម្លាក់ព្រូន ផឹកប្រេងអូលីវទាំងពោះទទេដើម្បីសម្រកគីឡូ ស្ងោរស្លឹកសាឡាត់ជួយឱ្យដេកលក់ស្រួល និង ការញ៉ាំពងជាមួយអាហារគ្រប់មុខជាដើម។ ដោយឡែកអ្នកផ្សេងទៀត ធ្វើការផឹកទឹកគ្រាប់ឈៀ (chia) ការបង្កត់អាហារ ឬញ៉ាំតែបន្លែ និង ទឹកផ្លែឈើជាដើម។
គួរឱ្យដឹងផងដែរថា តាមការស្ទង់មតិពីយុវវ័យចំនួន ២ ពាន់នាក់ មានពាក់កណ្ដាលបាននិយាយថាពួកគេពិតជាមានអារម្មណ៍ប៉ះពាល់នឹងចំនួននៃវិធីណែនាំងាយៗដែលរកឃើញមានលើអនឡាញណាស់ ៥២% នៃអ្នកទាំងនោះគឺមានអារម្មណ៍ច្របូកច្របល់លែងយល់ថាតើ trend មួយណាពិតជាមានប្រយោជន៍ពិតប្រាកដនោះ ហើយខ្លះទៀតក៏បានធ្វើតាមប៉ុន្តែមិនទទួលបានផលអ្វីនោះឡើយ។
លោកវេជ្ជបណ្ឌិត Karan Rajan គ្រូពេទ្យជំនាញវះកាត់ដែលមានអ្នកចុចតាមដានលើបណ្ដាញសង្គមជាង ១០ លាននាក់បានធ្វើការណែនាំផងដែរថា៖ «បណ្ដាញសង្គមអាចជាកន្លែងដ៏អស្ចារ្យមួយសម្រាប់ទទួលយកចំណេះដឹងពាក់ព័ន្ធនឹងសុខភាព ប៉ុន្តែមិនមែនគ្រប់ trend ទាំងអស់សុទ្ធតែទទួលស្គាល់ដោយអ្នកវិទ្យាសាស្ត្រនោះឡើយ»៕
ប្រភព៖ Kenh14
