ជាការពិតណាស់ រឿងរ៉ាវពាក់ព័ន្ធនឹងស្នេហារវាងតារាសម្ដែង Kim Sae Ron និង Kim Soo Hyun កំពុងក្លាយជាប្រធានបទដ៏ក្ដៅគគុកបំផុត ដោយរឿងទំនាក់ទំនងស្នេហារវាងតារាទាំង ២ នេះត្រូវបានទម្លាយដោយម្ដាយមីងរបស់ Kim Sae Ron ផ្ទាល់ ថាពួកគេបានទាក់ទងគ្នាយូរណាស់មកហើយតាំងពី Kim Sae Ron នៅជាក្មេងមិនទាន់គ្រប់អាយុ។
យ៉ាងណាមិញ ខណៈរឿងរ៉ាវកំពុងតែផ្ទុះក្ដៅខ្លាំង ឥលូវនេះក៏មានការទម្លាយ screenshots សារដែល Kim Sae Ron ឆ្លើយឆ្លងគ្នាជាមួយនឹងបងប្អូនជីដូនមួយរបស់នាង ដោយក្នុងសារនោះក៏មានសេចក្ដីថ្លែងការណ៍ដែលនាងសរសេរទុកដើម្បីបកស្រាយជុំវិញទំនាក់ទំនងនាងជាមួយ Kim Soo Hyun ដែលបានផ្ទុះផ្អើលកាលពីឆ្នាំ ២០២៤ នៅពេលដែលនាងបានបង្ហោះរូបជាមួយ Kim Soo Hyun លើ Story IG នោះ ប៉ុន្តែសេចក្ដីថ្លែងការណ៍នោះនាងមិនបានធ្វើការបង្ហោះជាសាធារណៈនោះឡើយ។ Screenshots ទាំងនោះដែរត្រូវបានទម្លាយដោយម្ដាយមីងរបស់នាងទៅឱ្យ Garo Sero Institute។
តាមរយៈសារដែលបានបែកធ្លាយ បងប្អូនជីដូនមួយរបស់ Kim Sae Ron បានត្អូញថាពួកអ្នកកាសែតបានទាក់ទងទៅនាងសួរនាំជុំវិញព័ត៌មានរបស់ Kim Sae Ron ដោយ Kim Sae Ron បានតបទៅនាងវិញកុំឱ្យទទួលទូរស័ព្ទរបស់អ្នកកាសែតទាំងនោះ។ ក្រោយមក Sae Ron ក៏បានចែករំលែកសេចក្ដីថ្លែងការណ៍ដែលនាងបានសរសេរត្រៀមទុករួចរាល់ដើម្បីបកស្រាយតែរូបនាងមិនបានបង្ហោះវាជាសាធារណៈឡើយនៅពេលនោះ។
សេចក្ដីថ្លែងការណ៍នោះបានរៀបរាប់ថា៖ «សួស្ដី! នេះគឺ Kim Sae Ron។ ជាដំបូង ខ្ញុំសុំធ្វើការសុំទោសចំពោះគ្រប់គ្នា និង បុគ្គលិកក្នុងឧស្សាហកម្មទាំងអស់ដែលបានប៉ះពាល់ និង យល់ច្រឡំចំពោះទង្វើមិនចេះគិតរបស់ខ្ញុំ។ បើទោះជាសារព័ត៌មានបានចេញផ្សាយចចាមអារ៉ាមដែលបានចែកចាយលើប្រព័ន្ធផ្សព្វផ្សាយថាមិនមែនជាការពិតក៏ដោយ ខ្ញុំក៏ចង់មកបញ្ជាក់ឱ្យបានច្បាស់ថាវាមិនមែនជាការពិតដែរ។ រូបភាពដែលបានបង្ហោះលើ Story IG របស់ខ្ញុំគឺថតនៅក្នុងឆ្នាំ ២០១៦ ហើយពួកយើងបានទាក់ទងគ្នាចាប់ពីថ្ងៃទី ១៩ ខែវិច្ឆិកា ឆ្នាំ ២០១៥ ដល់ថ្ងៃទី ០៧ ខែកក្កដា ឆ្នាំ ២០២១។
យ៉ាងណាមិញ ខាង Gold Medalist បច្ចុប្បន្នកំពុងអះអាងថា ពួកគេមិនដឹងថាគោលបំណងខ្ញុំពីក្រោយការបង្ហោះនោះទេ ហើយនេះពិតជាមិនស៊ីគ្នាទាល់តែសោះជាមួយអ្វីដែលពួកគេកំពុងធ្វើ។ ខ្ញុំសង្ឃឹមថាពួកគេអាចនឹងទទួលស្គាល់ និង សុំទោសចំពោះទង្វើខុសឆ្គងរបស់ពួកគេដែលបណ្ដាលឱ្យប៉ះពាល់ដល់ខ្ញុំពេលដែលខ្ញុំស្ថិតក្រោមក្រុមហ៊ុននោះ។ ក្នុងនាមជាតារាសម្ដែងស្រីម្នាក់ដែលកេរ្តិ៍ឈ្មោះត្រូវបានបំផ្លាញដោយអ្នកមើល ខ្ញុំចង់ទុកការបង្ហោះនេះដោយជឿថាគ្រប់គ្នាត្រូវដឹងពីការពិត»។
គួរឱ្យដឹងផងដែរថា សារឆ្លើយឆ្លងរវាង Kim Sae Ron និង បងប្អូនជីដូនមួយនេះដែរកើតមានភ្លាមៗក្រោយពាក្យចចាមអារ៉ាមស្នេហារបស់នាង និង Kim Soo Hyun ផ្ទុះឡើងនៅពេលដែលនាងបង្ហោះរូប Selfie ជាមួយគ្នានោះ ហើយពេលនោះដែរខាងក្រុមហ៊ុនរបស់ Kim Soo Hyun ក៏បានចេញមកបដិសេធយ៉ាងម៉ាត់ៗដូចគ្នា៕
