ថ្មីៗ មហាជននៅតៃវ៉ាន់មានការភ្ញាក់ផ្អើលខ្លាំងក្រោយមានព័ត៌មានទម្លាយថា តារាសម្ដែងប្រុស Darren Wang បច្ចុប្បន្នកំពុងស្ថិតក្រោមការស៊ើបអង្កេតជុំវិញករណីប៉ុនប៉ងធ្វើរឿងឃាតកម្ម។
ករណីប៉ុនប៉ងមនុស្សឃាតនេះដែរត្រូវបានឱ្យដឹងថាបានកើតឡើងក្នុងខែមេសា ឆ្នាំ ២០២៤ កន្លងទៅ ដោយតាមរបាយការណ៍បានទម្លាយថា នៅពេល Darren Wang វិលត្រឡប់មកតៃវ៉ាន់វិញដោយបានខលកក់សេវាទទួលនៅព្រលានយន្តហោះតាមរយៈ UBER។ យ៉ាងណាមិញ ពេលឡានមកដល់ Darren Wang ហាក់មិនពេញចិត្តនោះឡើយដោយរថយន្ត Tesla មួយគ្រឿងនោះមើលទៅគុណភាពអន់។ Darren ក៏បានបង្ហាញទង្វើទាំងកំរោល វាយកញ្ចក់បង្អួច និង មានការទាស់ពាក្យសម្ដីជាមួយអ្នកបើកឡាន ហើយក្រោយមកលោកក៏បានទាក់ទងជាមួយក្រុមទំនើងដោយជួលពួកគេឱ្យទៅវាយតប់អ្នកបើកឡាន រួមទាំងអ្នកដែលទទួលការកក់ពីលោករហូតរងរបួសជាទម្ងន់។
ដោយឡែក ថ្មីៗនេះ វីដេអូនៃជម្លោះទាស់ទែងរវាង Darren Wangg ជាមួយនឹងអ្នកបើក UBER ត្រូវបានទម្លាយចែកចាយ។ វីដេអូនោះដែរ ទំនងជាទាញចេញពីកាមេរ៉ាក្នុងឡាន ដោយបង្ហាញឱ្យឃើញ Darren Wang ដើរចេញពីឡានទាំងទ្វារបើកចោល។ ក្រោយមក លោកក៏បានដើរទៅពីមុខឡានខណៈកាន់ទូរស័ព្ទមើល មុនលើកម្រាមដៃកណ្ដាលដាក់អ្នកបើកឡើងហើយដើរចេញទៅបាត់ទៅ៕
