រថយន្តដឹកប្រេងមួយគ្រឿង ជួបគ្រោះថ្នាក់ផ្ទុះឆេះសន្ធោសន្ធៅនៅរដ្ឋ Niger ប្រទេសនីហ្សេរីយ៉ា ស្របពេលមនុស្សជាច្រើនសម្រុកទៅលួចដួសប្រេងដែលហូរធ្លាយ បណ្ដាលឱ្យមនុស្សយ៉ាងហោចណាស់ ៣៥ នាក់បានបាត់បង់ជីវិត ខណៈច្រើននាក់ផ្សេងទៀតរងរបួស។
បើតាមអ្នកសម្របសម្រួលរបស់ទីភ្នាក់ងារឆ្លើយតបគ្រោះអាសន្ន បានឱ្យដឹងកាលពីថ្ងៃទី ២១ ខែតុលា ឆ្នាំ ២០២៥ កន្លងទៅថា ដំបូងឡើយ រថយន្តដឹកប្រេងបានជួបគ្រោះថ្នាក់ក្រឡាប់រហូតហូរប្រេងពេញផ្លូវ។ ឃើញបែបនេះ មនុស្សនៅទីតាំងកើតហេតុក៏នាំគ្នាសម្រុកចូលទៅដួសប្រឹងដែលហៀរចេញនោះ តែអកុសលអីឡានក៏ផ្ទុះឆេះឡើង បណ្ដាលឱ្យមនុស្សដែលចូលទៅដួសប្រេងទាំងប៉ុន្មានរងការរលាករហូតស្លាប់ និង របួសច្រើននាក់។
បច្ចុប្បន្ន ប៉ូលិសកំពុងដាក់ការស៊ើបអង្កេតស្វែងរកអត្តសញ្ញាណអ្នកបើកបរ ម្ចាស់ឡានដឹកប្រេង និង មូលហេតុបង្កជាគ្រោះថ្នាក់ចរាចរណ៍នេះកើតឡើង៕
ប្រភព៖ VN Express
