កាលពីថ្ងៃទី ២៨ ខែកុម្ភៈ ឆ្នាំ ២០២៥ កន្លងទៅ មានករណីបុរសជនជាតិស្រីលង្កាម្នាក់នៅក្រុង Iskandar Puteri រដ្ឋ Johor ប្រទេសម៉ាឡេស៊ី ត្រូវបានមិត្តស្រីចាប់ជំរិតទាំងកំពុងធ្វើការនៅកន្លែងការងារ ក្រោយរូបលោក និង នាងបានសម្រេចចិត្តចែកផ្លូវគ្នា។
តាមសេចក្ដីប្រកាសផ្លូវការពី PDRM បានឱ្យដឹងថា ប៉ូលិសទទួលបានការរាយការណ៍មួយពីបុរសវ័យ ៤២ ឆ្នាំម្នាក់ដែលជាមេរបស់បុរសជនជាតិស្រីលង្កាវ័យ ២៦ ឆ្នាំខាងលើ។ តាមបុរសជាមេរូបនោះបានឱ្យដឹងថា ជនរងគ្រោះត្រូវបានគេចាប់យកទៅអំឡុងពេលកំពុងធ្វើការនៅកន្លែងលាងឡាននៅវេលាម៉ោងប្រមាណ ៩ ព្រឹកថ្ងៃទី ២៨ ខែកុម្ភៈ។
ប៉ូលិសបានចុះប្រតិបត្តិការភ្លាមៗ ហើយក្នុងពេលមិនដល់ ២៤ ម៉ោងផង ប៉ូលិសក៏ចាប់បានជនសង្ស័យចំនួន ៤ នាក់ក្នុងករណីចាប់ជំរិតមនុស្សនេះ។ តាមប៉ូលិសបានឱ្យដឹងថា នៅម៉ោងប្រមាណជា ៧ កន្លះព្រឹកថ្ងៃទី ០១ ខែមីនា មនុស្សប្រុស ២ នាក់ និង ស្រី ២ នាក់អាយុចន្លោះ ១៨ ដល់ ៣៧ ឆ្នាំ ត្រូវបានចាប់ខ្លួនបាននៅក្រុង Kuala Selangor។ ចំពោះការតេស្តរកសារធាតុញៀន ជនសង្ស័យទាំង ៤ នាក់នោះគឺគ្មានសារធាតុញៀនទេ ប៉ុន្តែមានម្នាក់ក្នុងចំណោមនោះធ្លាប់មានប្រវត្តិបទឧក្រិដ្ឋ។ ក្នុងនោះដែរ ប៉ូលិសក៏រឹបអូសបានទូរស័ព្ទចំនួន ៤ គ្រឿង និង ឡានចំនួន ២ គ្រឿង។
អំឡុងពេលស៊ើបអង្កេតនោះដែរ ប៉ូលិសក៏បានរកឃើញដែរថាជនរងគ្រោះគឺជាមិត្តប្រុសរបស់ស្ត្រីជាជនសង្ស័យម្នាក់ ហើយចំពោះគោលបំណងនៃការចាប់ជំរិតនេះ ជំហានដំបូងប៉ូលិសគិតថាជាគម្រោងរៀបចំឡើងក្រោយជនរងគ្រោះចែកផ្លូវចាកចេញពីមិត្តស្រីរបស់គេ។ បច្ចុប្បន្ន ជនសង្ស័យទាំងអស់ត្រូវបានបញ្ជូនសំណុំរឿងដើម្បីកាត់ទោសតាមផ្លូវច្បាប់៕
ប្រភព៖ World Of Buzz
