ករណីថ្មី! គ្រូទាយចិនម្នាក់ត្រូវសង្សារដាក់ថ្នាំពុលលើលីអូ ហើយដាក់ក្នុងសេរ៉ូផ្ដាសាយឱ្យផឹកទៀតរហូតស្ល-ា/ប់ ខឹងរឿងមិនព្រមរៀបការ

តុលាការនៅខេត្ត Sichuan ប្រទេសចិន ថ្មីៗនេះបានព្យាយាមដោះស្រាយករណីដ៏ចម្លែកមួយដោយគ្រូទាយម្នាក់ឈ្មោះ Zhou ត្រូវបានបាត់បង់ជីវិតដោយសង្សារឈ្មោះ Jing បំពុល ព្រោះតែខឹងរឿងលោកមិនព្រមរៀបការជាមួយ។

តាមព័ត៌មាន Sin Chew Daily បានឱ្យដឹងថា ដំបូងឡើយតុលាការបានរកឃើញថានារីជាសង្សារពិតជាធ្វើការសម្លាប់បុរសជាគ្រូទាយដោយចេតនាពិតប្រាកដមែន រួមទាំងកាត់ទោសឱ្យនាងជាប់ពន្ធនាគារ ១៤ ឆ្នាំទៀត។ យ៉ាងណាមិញ ខាងនារីនោះក៏បានដាក់បណ្ដឹងឧទ្ធរណ៍ ប៉ុន្តែថ្មីៗនេះខាងតុលាការបានធ្វើការច្រានចោលពាក្យបណ្ដឹងនោះជាលើកទី ២ ដោយសម្រេចតម្កល់នៅសាលក្រមដើម។

ដើមហេតុនៃករណីនេះគឺកើតមានឡើងក្រោយស្ត្រីខាងលើបានធ្វើការជ្រលក់ខោក្នុងចំនួន ៤ ជាមួយថ្នាំកម្ចាត់ស្មៅ (paraquat) រួចយកខោទាំងនោះទៅឱ្យជាកាដូដល់គូស្នេហ៍ក្នុងឆ្នាំ ២០១៧។ បុរសរងគ្រោះដោយមិនដឹងក៏យកខោនោះពាក់ហើយក៏ចាប់ផ្ដើមកើតមានដំបៅលើរាងកាយ។ យ៉ាងណាមិញ ការស្លៀកខោក្នុងមានថ្នាំពុលនេះមិនបានធ្វើឱ្យលោកឈានដល់ការបាត់បង់ជីវិតនោះឡើយ ដោយអ្វីធ្វើឱ្យលោកស្លាប់នោះគឺនៅពេលនារីជាសង្សារបានយកទឹកសេរ៉ូផ្ដាសាយដែលលាយថ្នាំពុលទៅឱ្យលោកផឹក។

ដោយឡែក ករណីស្លាប់នេះខាងកូនស្រីជនរងគ្រោះកើតមានការសង្ស័យ ទើបដាក់ពាក្យប្ដឹងទៅប៉ូលិស ហើយក្រោយការស៊ើបអង្កេតទើបប៉ូលិសរកឃើញថាជនរងគ្រោះគឺពិតជាត្រូវមិត្តស្រីសម្លាប់ពិតមែន។ ចំពោះមូលហេតុនោះគេជឿជាក់ថាដោយសារតែការគុំកួនរបស់នាង នាងខឹងខាងប្រុសស្ទាក់ស្ទើរមិនចង់រៀបការ ហើយណាមួយនាងគិតថាសង្សារជាអ្នកធ្វើឱ្យនាងរលូតកូនព្រោះតែគេមើលថែនាងមិនបានល្អ ទើបនាងរកវិធីសងសឹកវិញបែបនេះ។

គួររំឭកឱ្យដឹងថា នារីដៃដល់ និង បុរសរងគ្រោះបានជួបគ្នាដំបូងក្នុងឆ្នាំ ២០១១ នៅពេលម្ដាយខាងស្រីបានទៅរកលោកជាគ្រូទាយឱ្យជួយមើលពាក់ព័ន្ធនឹងបញ្ហាសុខភាពរបស់គាត់៕