មានករណីគ្រោះថ្នាក់ដ៏កម្រមួយបានកើតមានឡើងលើបុរសវ័យ ៦១ ឆ្នាំម្នាក់ឈ្មោះ Keith McAllister ដោយរូបលោកត្រូវបាត់បង់ជីវិតព្រោះតែពាក់ខ្សែ-កទម្ងន់ដល់ទៅ ៩ គីឡូ ចូលម៉ាស៊ីន MRI ហើយក៏ត្រូវម៉ាស៊ីនស្រូបជាប់។ ហេតុការណ៍នេះដែរបានកើតឡើងកាលពីថ្ងៃទី ១៦ ខែកក្កដា ឆ្នាំ ២០២៥ កន្លងទៅ នៅទីតាំងកន្លែងស្កេនម៉ាស៊ីន MRI មួយកន្លែងក្នុងភូមិ Westbury រដ្ឋញ៉ូយ៉ក សហរដ្ឋអាមេរិក។
តាមការរៀបរាប់ពីលោកស្រី Adrienne Jones-McAllister ដែលត្រូវជាភរិយាជនរងគ្រោះបានឱ្យដឹងថា រូបគាត់បានទៅស្កេន MRI មើលបញ្ហាជង្គង់ ហើយក្រោយស្កេនរួច ខាងគ្រូពេទ្យបច្ចេកទេសបានចេញពីបន្ទប់ទៅហៅលោក Keith ឱ្យចូលមកក្នុងជួយលើកប្រពន្ធឱ្យងើបចេញពីម៉ាស៊ីន។ លោក Keith បានដើរចូលទៅទាំងដែល-កកំពុងពាក់ខ្សែកដែកទម្ងន់ ៩ គីឡូ ហើយក៏ត្រូវម៉ាស៊ីនស្រូបចូលតែម្ដង។
ភ្លាមៗ ទាំងភរិយាលោក និង ក្រុមគ្រូពេទ្យបច្ចេកទេស ភ័យស្លន់ព្យាយាមទាញ Keith ចេញពីម៉ាស៊ីនដែរតែមិនអាចទាញចេញបានឡើយ។ បើតាមកូនស្រីលោក Keith ឈ្មោះ Samantha បានបញ្ជាក់ថា ឪពុកខ្លួនគឺត្រូវស្រូបចូលម៉ាស៊ីនជាប់គាំងក្នុងនោះជិតមួយម៉ោងមុនពេលទាញចេញវិញបាន។ លោកបានបញ្ជូនទៅសង្គ្រោះនៅមន្ទីរពេទ្យ ប៉ុន្តែជាអកុសលលោកបានបាត់បង់ជីវិតនៅថ្ងៃបន្ទាប់ ក្រោយគាំងបេះដូងច្រើនលើកច្រើនសាដោយសារតែផលប៉ះពាល់នៃម៉ាស៊ីន។
សាច់ញាតិរបស់ជនរងគ្រោះបាននិយាយថា លោក Keith គឺតែងពាក់ខ្សែកនោះរាល់ពេលទៅមណ្ឌលសុខភាពនោះកាលពីមុនៗ ហើយខាងគ្រូពេទ្យក៏ឃើញច្រើនលើកច្រើនសាដែរ និង ថែមទាំងនិយាយពីវាថែមទៀត។ យ៉ាងណាមិញ ខាងអាជ្ញាធរបាននិយាយថា លោក Keith គឺមិនត្រូវបានអនុញ្ញាតឱ្យចូលទៅបន្ទប់ MRI ឡើយ តែកូនស្រីរបស់លោកជំទាស់ និង លើកឡើងថា៖ «សារព័ត៌មានជាច្រើនថាឪពុកខ្ញុំមិនអនុញ្ញាតឱ្យចូលឡើយ តែការពិតគឺខាងគ្រូពេទ្យបច្ចេកទេសអនុញ្ញាតឱ្យគាត់ចូលបន្ទប់នោះ»។
ខាងប៉ូលិសបានស៊ើបអង្កេតលើករណីមួយនេះ ប៉ុន្តែរកមិនឃើញភស្តុតាងណាបញ្ជាក់ពីការធ្វើឃាត ឬការប្រព្រឹត្តខុសដោយចេតនានោះឡើយ។ ជាមួយគ្នានោះ ខាងសារព័ត៌មាន Daily Mail ក៏បានទាក់ទងទៅខាងអ្នកគ្រប់គ្រងមណ្ឌល MRI ខាងលើដែរ តែមិនទទួលបានការឆ្លើយតបនោះទេ៕
