ករណីកម្រជួបប្រទះ! ក្មេងស្រីវ័យត្រឹម ១១ ឆ្នាំម្នាក់ ថត X-ray ឃើញក្នុងមាត់មានធ្មេញឡើងស្កះ ដល់ទៅ ៨១ គ្រាប់

មានករណីដ៏កម្រមួយបានកើតឡើងលើក្មេងស្រីអាយុ ១១ ឆ្នាំម្នាក់នៅប្រទេសប្រេហ្ស៊ីល ដែលទៅពេទ្យធ្មេញក្នុងបំណងដកធ្មេញទឹកដោះចេញ តែយ៉ាងណាមិញ គ្រូពេទ្យបែរជាមានការភ្ញាក់ផ្អើលជាខ្លាំងពេលដែលលទ្ធផលថត X-ray បង្ហាញថានាងតូចមានធ្មេញក្នុងមាត់សរុបរហូតដល់ទៅជាង ៨០ គ្រាប់ឯណោះ។

លម្អិតទៅ លទ្ធផលស្កេនបង្ហាញថា ក្មេងស្រីខាងលើមានធ្មេញសរុបចំនួន ៨១ គ្រាប់ដោយក្នុងនោះរួមមាន ១៨ គ្រាប់ជាធ្មេញទឹកដោះ ៣២ គ្រាប់ជាធ្មេញអចិន្ត្រៃយ៍ និង ៣១ គ្រាប់ទៀតជាធ្មេញលើស។ រូបភាព X-ray បង្ហាញឱ្យឃើញទៀតថា ធ្មេញជាច្រើនមានទម្រង់ខុសប្រក្រតី ដែលជាហេតុធ្វើឱ្យមានការពិបាកក្នុងការបែងចែកថាមួយណាជាធ្មេញធម្មតា មួយណាជាធ្មេញដែលលើស។

តាមការបកស្រាយពីខាងវេជ្ជបណ្ឌិតបានរៀបរាប់ថា ការដុះធ្មេញលើសគឺជាការលូតលាស់ខុសប្រក្រតីដ៏កម្រមួយដែលអាចកើតមានឡើងគ្រប់កន្លែងនៅត្រង់ថ្គាម ហើយវាផ្ដល់ការប៉ះពាល់ដល់ធ្មេញល្អទូទៅធម្មតា។ ដោយឡែកចំពោះករណីដែលមានធ្មេញលើសច្រើនខ្លាំងបែបនេះ គឺជាករណីដែលកកម្របំផុតលើមនុស្សដែលមិនមានជំងឺ ឬអាការកើតឡើងដោយហ្សែននោះ។

ចំពោះករណីក្មេងស្រីខាងលើ ការព្យាបាលគឺជាបញ្ហាប្រឈមមួយសម្រាប់ក្រុមគ្រូពេទ្យ ព្រោះថាធ្មេញជាច្រើននឹងត្រូវដកចេញ ហើយទម្រង់ធ្មេញគឺនឹងត្រូវខូចទ្រង់ទ្រាយ។ សម្រាប់ការព្យាបាលឱ្យមានប្រសិទ្ធភាព គោលដៅនៃការព្យាបាលត្រូវតែធ្វើឡើងតាមការវាយតម្លៃដ៏ទូលំទូលាយពីក្រុមអ្នកជំនាញ៕

ប្រភព៖ Kenh14