នៅព្រឹកថ្ងៃទី ១៣ ខែវិច្ឆិកា ឆ្នាំ ២០២៥ នេះ សារព័ត៌មាន The Nation Thailand បានចេញផ្សាយថា នៅកោះសាមុយ ខេត្ត Surat Thani ប្រទេសថៃ នៅកណ្ដាលយប់មិញនេះ បានរងការវាយប្រហារពីគ្រោះរញ្ជួយដីកម្រិតស្រាល បង្កជាការព្រួយបារម្ភ និង ភ័យខ្លាចដល់ពលរដ្ឋក្នុងភូមិស្រុក។
តាមព័ត៌មានបានឱ្យដឹងថា គ្រោះរញ្ជួយដីនោះមានកម្រិត ២.៤ រ៉ិចទ័រ បានវាយប្រហារនៅវេលាម៉ោង ១២ និង ៤៧ នាទី រំលងអធ្រាត្រឈានចូលថ្ងៃទី ១៣ ខែវិច្ឆិកា ឆ្នាំ ២០២៥ នេះ អង្រួនរង្គើនៅតំបន់ជុំវិញកោះសាមុយ ខេត្ត Surat Thani។
គ្រោះរញ្ជួយដីនេះដែរ មានជម្រៅ ៤ គីឡូម៉ែត្រ ហើយទោះជាគ្រោះរញ្ជួយដីក្នុងកម្រិតស្រាលក្ដី ប៉ុន្តែភាពរង្គើរញ្ជួយគឺមានពាសពេញតំបន់ទាំងអស់ ជាពិសេសគឺនៅក្នុងស្រុក Bo Phut ដែលពលរដ្ឋរងការរង្គើ និង ឮសំឡេងខ្លាំងៗជាងគេ៕
