អ្នកបើកបរនៅទីក្រុង Mumbai ប្រទេសឥណ្ឌា ជាធម្មតាគឺតែងតែចុចស៊ីផ្លេខណៈពេលដែលពួកគេធ្វើដំណើរតាមដងផ្លូវ បង្កជាការបំពុលសំឡេងធ្ងន់ធ្ងររហូតសូម្បីតែប៉ូលិសចរាចរណ៍ក៏ទប់ទល់លែងជាប់។
ជាការពិតណាស់ រាល់ពេលដែលចេញមកក្រៅនៅតាមផ្លូវ ពលរដ្ឋក្នុងក្រុង Mumbai ប្រទេសឥណ្ឌាគឺតែងតែប្រឈមជានិច្ចនឹងការបំពុលសំឡេងដោយចរាចរណ៍តាមដងផ្លូវ។ អ្នកបើកឡានគឺតែងតែចុចស៊ីផ្លេឥតស្រាកស្រាន្ត នៅពេលដែលប្រទះអ្នករាំងផ្លូវខាងមុខ។
ជាក់ស្ដែង តាមការបញ្ជាក់ពីអ្នកយកព័ត៌មានប្រចាំក្រុង Mumbai របស់ NPR បានរាប់ចំនួនស៊ីផ្លេកាលពីរសៀលថ្ងៃមួយកាលពីខែសីហាកន្លងទៅបានរកឃើញថា ក្នុងមួយនាទីមានអ្នកចុចស៊ីផ្លេជាមធ្យម ២៧ ដង។ ជាមួយគ្នានោះដែរ តាមការរៀបរាប់ពីប៉ូលិសចរាចរណ៍ម្នាក់ឈ្មោះ Vikas Rahane ដែលប្រចាំការនៅពេលនោះបាននិយាយថា ការស៊ីផ្លេនេះគឺជារឿងធម្មតាទៅហើយ ហើយបើកំឡុងពេលមមាញឹកទៀតនោះ ស៊ីផ្លេកាន់តែឮច្រើនជាងនេះទៀត។
លោកប៉ូលិស Rahane បាននិយាយបន្ថែមទៀតថា សំឡេងស៊ីផ្លេទាំងនោះពេលខ្លះក៏ធ្វើឱ្យលោកភ្ញាក់ដែរ និង ធ្ងន់ធ្ងរនោះ វាបានធ្វើឱ្យប៉ូលិសចរាចរណ៍ខ្លះទៀតប៉ះពាល់ត្រចៀករហូតស្ដាប់លែងឮទៀតផង។
គួរឱ្យដឹងថា ក្រោមច្បាប់របស់ឥណ្ឌា អ្នកបើកបរអាចប្រឈមនឹងការពិន័យជាប្រាក់ដល់ ២៥ ដុល្លារ ប្រសិនបើរកឃើញថាស៊ីផ្លេញឹកញាប់ពេក ឬស៊ីផ្លេដោយគ្មានមូលហេតុ។ ទោះជាយ៉ាងណា បើតាមលោក Subhash Shinde មេរបស់ប៉ូលិសចរាចរណ៍ Rahane បានលើកឡើងដូច្នេះថា ចរាចរណ៍ក្នុងក្រុង Mumbai គឺវីវក់ខ្លាំងណាស់ ប៉ូលិសគ្មានពេលវេលាទៅផ្ដោតលើការស៊ីផ្លេនោះឡើយ ដោយពួកគេរវល់សម្រួលចរាចរណ៍ និង ជួយអ្នកថ្មើរជើងឆ្លងផ្លូវដោយសុវត្ថិភាព៕
ប្រភព៖ VN EXPRESS
