សារព័ត៌មាន Daily Mail ថ្មីៗនេះ បានចេញផ្សាយដំណឹងរីករាយមួយថា តារាសម្ដែងប្រុស Chris Evans ដែលគ្រប់គ្នាស្គាល់ច្បាស់ជាតួអង្គ Captain America បានស្វាគមន៍ដំណក់ឈាមដំបូងរួមគ្នាជាមួយភរិយារូបស្រស់ Alba Baptista ក្រោយទើបតែអបអរខួបអាពាហ៍ពិពាហ៍ ២ ឆ្នាំជាមួយគ្នារួច។
យ៉ាងណាមិញ ចំពោះភេទទាយាទដំបូងរបស់គូស្នេហ៍តារារូបនេះនៅមិនទាន់បានប្រកាសនៅឡើយទេ ហើយព័ត៌មានលម្អិតនានាពាក់ព័ន្ធនឹងកូនតារាវ័យ ៤៤ ឆ្នាំខាងលើនេះក៏រក្សាការសម្ងាត់ដូចគ្នា។ តាមសារព័ត៌មាន TMZ បានបញ្ជាក់ថា Baptista ភរិយារបស់ Chris Evans បានសម្រាលកូនដំបូងនៅរដ្ឋ Massachusetts កាលពីថ្ងៃទី ២៥ ខែតុលា ឆ្នាំ ២០២៥ កន្លងទៅ។
គួររំឭកថា តារាសម្ដែង Chris Evans និង Alba Baptista បានប្ដូរឈ្មោះក្លាយជាប្ដីប្រពន្ធនឹងគ្នាជាផ្លូវការ កាលពីថ្ងៃទី ០៩ ខែកញ្ញា ឆ្នាំ ២០២៣ ក្រោមសក្ខីភាពពីក្រុមគ្រួសារ និង មិត្តជិតស្និទ្ធរបស់ពួកគេ៕
