នៅថ្ងៃទី ០៦ ខែមិថុនា ឆ្នាំ ២០២៥ នេះ សារព័ត៌មានក្នុងប្រទេសកូរ៉េបានចែករំលែកព័ត៌មានដ៏សោកសៅមួយដោយតារាម៉ូដែល Kim Jong Suk បានទទួលមរណភាពទៅហើយក្នុងវ័យ ២៩ ឆ្នាំ កាលពីថ្ងៃទី ០៤ ខែមិថុនា ឆ្នាំ ២០២៥ កន្លងទៅ។ ពិធីបុណ្យសពរបស់លោកនឹងរៀបចំធ្វើឡើងនៅថ្ងៃទី ០៦ មិថុនានេះ នាទីកន្លែងរៀបចំពិធីបុណ្យនៅក្រុង Hannam ខេត្ត Gyeonggi។ ចំពោះមូលហេតុនៃការស្លាប់របស់ម៉ូដែលប្រុសរូបនេះ នៅមិនទាន់មានការបញ្ជាក់នៅឡើយទេ។
ដំណឹងមរណភាពរបស់ Kim Jong Suk ត្រូវបានប្រកាសលើបណ្ដាញសង្គមដោយអ្នកស្គាល់គ្នាជាមួយលោក កាលពីថ្ងៃទី ០៥ ខែមិថុនា ឆ្នាំ ២០២៥ កន្លងទៅ ដោយសំណេរនោះបានសរសេររៀបរាប់ថា៖ «បងប្អូនប្រុសរបស់ខ្ញុំ បេះដូងខ្ញុំខ្ទេចខ្ទីជាបំណែកហើយពេលដែលទទួលដំណឹងថាឯងចាកចេញទៅ។ ខ្ញុំនៅតែមិនចង់ជឿឡើយថាខ្ញុំលែងអចឃើញស្នាមញញឹមលើមុខឯងតទៅទៀត។ ឯងអាចនឹងមិនឋិតនៅជាមួយយើងតទៅទៀត ប៉ុន្តែសូមឯងដឹងថាឯងនៅតែជាកាដូដ៏អស្ចារ្យបំផុតមួយសម្រាប់ពិភពលោកនេះ ហើយខ្ញុំនឹងនៅតែចងចាំវត្តមានរបស់ឯងដិតជាប់ក្នុងបេះដូងខ្ញុំជានិច្ច។ ខ្ញុំនៅនឹករឭកឯងរហូត និង នៅតែស្រឡាញ់ឯងរហូត»។
គួររំឭកថា លោក Kim Jong Suk គឺទទួលបានភាពល្បីល្បាញមានមហាជនស្គាល់ច្រើនក្នុងនាមជាតារាម៉ូដែលប្រចាំប្រេនថែរក្សាសម្រស់ DASHU។ កាលពីឆ្នាំ ២០២២ លោកក៏ធ្លាប់បានបង្ហាញខ្លួនក្នុងកម្មវិធី dating show មួយឈ្មោះថា «Skip Dating» ដែលមានលោក Yoo Jae Suk, តារាស្រី Jeon So Min និង តារារ៉េប Nuksal ជាពិធីករ៕
ប្រភព៖ AllKpop
