ថ្មីៗនេះ តារាសម្ដែងប្រុសដ៏ល្បីប្រចាំទូរទស្សន៍ TVB លោក Bosco Wong បានធ្វើឱ្យមហាជនក៏ដូចជាអ្នកគាំទ្រជាច្រើនភ្ញាក់ផ្អើលខ្លាំង នៅពេលដែលលោកចេញមកទម្លាយមូលហេតុដែលមិនព្រមរៀបការសាងគ្រួសារ ទោះបីឥលូវអាយុ ៤៤ ឆ្នាំហើយក៏ដោយ។
ក្នុងកិច្ចសម្ភាសមួយ តារាប្រុស Bosco Wong បាននិយាយថា លោកសម្រេចចិត្តមិនរៀបចំព្រោះតែចង់សងសឹកម្ដាយរបស់លោក។ Bosco Wong បាននិយាយថា៖ «ម្ដាយខ្ញុំចូលចិត្តដេញមិត្តស្រីខ្ញុំចេញ។ អ៊ឹចឹងល្អហើយ ខ្ញុំមិនរៀបការទៀតទេ ធ្វើឱ្យគាត់ខឹងម្ដងមើល»។
ការបើកកកាយលើកឡើងរបស់ Bosco Wong នេះដែរ បានបង្កឱ្យមានការផ្ទុះវែកញែកពាសពេញបណ្ដាញសង្គមក្នុងប្រទេសចិន ដោយមហាជនមួយចំនួនបង្ហាញការមិនពេញចិត្ត និង ខឹងចំពោះការលើកឡើងរបស់លោកចំពោះម្ដាយខ្លួនផងដែរ។
ដោយឡែក បើតាមសារព័ត៌មានចិន Page 163 បានលើកឡើងថា ម្ដាយ Bosco Wong មានអត្តចរិតកាចហួងហែងខ្លាំងបែបនេះក៏ព្រោះតែគាត់ឆ្លងកាត់រឿងរ៉ាវជាច្រើនក្នុងជីវិត។ អាពាហ៍ពិពាហ៍របស់គាត់បានបែកបាក់ទាំងដែលគាត់កំពុងពពោះកូនក្នុងផ្ទៃ ហើយថែមទាំងត្រូវទូលរែកបន្ទុកគ្រួសារចិញ្ចឹមកូនតែម្នាក់ឯង។ គាត់ថែមទាំងត្រូវបញ្ជូន Bosco Wong ឱ្យទៅរស់នៅជាមួយសាច់ញាតិ ដើម្បីយកពេលប្រឹងប្រែងធ្វើការទាំងយប់ទាំងថ្ងៃ ដើម្បីសន្សំលុយផ្គត់ផ្គង់កូនទៀតផង។
ពេល Bosco ចូលប្រឡូកវិស័យសិល្បៈដំបូង លោកគឺជួបផលលំបាក ប្រាក់ខែទទួលបានគឺមិនគ្រប់គ្រាន់សម្រាប់ចិញ្ចឹមជីវិតឡើយ។ នៅពេលនោះ ម្ដាយលោកជួយខាងលុយកាក់ឱ្យលោកឆ្លងផុតពេលវេលាលំបាកនោះ។ ប្រាកដណាស់ ក្រោយមក Bosco ក៏ទទួលបានជោគជ័យលើអាជីពមួយនេះ ហើយលោកក៏បានបង្ហាញការដឹងគុណគោរពចំពោះម្ដាយ មើលថែទាំម្ដាយដោយក្ដីស្រឡាញ់។ ពេលខ្លះ ប្រហែលលោក និង ម្ដាយ មានការប៉ះទង្គិច ឬអន់ចិត្តនឹងគ្នាតិចតួច តែក្ដីស្រឡាញ់របស់ពួកគេគឺពិតជាមិនអាចខ្វះគ្នាបានឡើយ។
Page 163 ដដែលបានទម្លាយហេតុផលមួយទៀតដែលម្ដាយ Bosco Wong តែងតែរារាំងរាល់ពេលដែលលោកទាក់ទងស្នេហាជាមួយនារីណាម្នាក់។ ក្រោយលែងលះស្វាមី ម្ដាយ Bosco មិនបានចិញ្ចឹមកូនដោយខ្លួនឯងទេ ដោយឱ្យកូនទៅរស់នៅជាមួយជីដូន។ រំឮកដល់រឿងនេះ Bosco Wong ធ្លាប់បាននិយាយថា៖ «ខ្ញុំនៅចាំច្បាស់ថា លោកយាយរបស់ខ្ញុំតែងតែស្ដីឱ្យម្ដាយខ្ញុំ បន្ទោសគាត់ថារៀបការជាមួយមនុស្សខុស ធ្វើឱ្យគាត់យំយ៉ាងខ្លាំង»។ ប្រហែលហេតុផលនេះហើយដែលម្ដាយ Bosco Wong មិនជឿលើរឿងស្នេហា និង ការរៀបការទៀត ហើយក៏ភ័យខ្លាចថាកូនប្រុសអាចរើសមនុស្សខុស ហើយដើរតាមគន្លងរបស់គាត់៕
ប្រភព៖ Kenh14
