ឃើញក្នុងរឿងនិយាយពីដំណាក់ត្រជាក់ ឥលូវមកមើលដំណាក់ត្រជាក់ពិតប្រាកដ ទុកឃុំស្រីស្នំមានទោសក្នុងវាំងចិនបុរាណ

ប្រសិនបើប្រិយមិត្តនិយមទស្សនារឿងភាគបុរាណចិន នោះអ្នកទាំងអស់គ្នាប្រាកដណាស់ជាធ្លាប់ឮពីដំណាក់មួយដែលហៅថា «ដំណាក់ត្រជាក់»។ ដំណាក់មួយនេះដែរ គឺគេទុកប្រើប្រាស់សម្រាប់ដាក់ឃុំឃាំងស្រីស្នំណាដែលប្រព្រឹត្តបទឧក្រិដ្ឋ ឬខុសវិន័យអ្វីមួយធ្វើឱ្យមហាក្សត្រមិនពេញចិត្ត។ រាល់ស្នំដែលបញ្ជូនទៅដាក់នៅដំណាក់ត្រជាក់ នោះពួកគេនឹងលែងមានសេរីភាព លែងមានជីវិតស្រស់បំព្រង និង ថែមទាំងលែងទទួលបានការគោរពពីបាវបម្រើនានា។ ហេតុដូច្នេះហើយ ទើបជាដំណាក់មួយនេះត្រូវគេចាត់ទុកជាទីតាំងដែលអាក្រក់បំផុតនៅព្រះរាជវាំង Forbidden City។

Forbidden City ឬហៅថា ទីក្រុងហាមឃាត់ គឺជារាជវាំងបុរាណចិនដ៏ធំបំផុតមួយសាងសង់លើផ្ទៃដីរហូតដល់ ៧២ ម៉ឺនម៉ែត្រការ៉េ ស្ថិតនៅទីក្រុងប៉េកាំង ប្រទេសចិន។ រាជវាំងបុរាណនេះដែរមានដំណាក់សរុបចំនួន ៨០០ និង បន្ទប់ចំនួន ៩៩៩៩ បន្ទប់។ បើទោះជាមានដំណាក់ច្រើនក៏ពិតមែន ប៉ុន្តែជាក់ស្ដែងទៅ នៅ Forbidden City គឺមិនមានទីតាំងជាក់លាក់ណាមួយសម្រាប់ «ដំណាក់ត្រជាក់» នោះឡើយ។ ក្នុងកំណត់ត្រានៃរាជវង្ស មីង និង ឈីង គឺមិនមានឯកសារណាលើកឡើងពី «ដំណាក់ត្រជាក់» ឡើយ មានន័យថាឈ្មោះដំណាក់ត្រជាក់នេះ គឺមិនត្រូវបានគេប្រើប្រាស់សម្រាប់សម្គាល់រាជដំណាក់ជាក់លាក់នោះឡើយ។

ឈ្មោះ «ដំណាក់ត្រជាក់» នៅ Forbidden City គឺជាឈ្មោះប្រើប្រាស់ទូទៅសម្រាប់សំដៅលើទីកន្លែងដែលទុកសម្រាប់ឃុំខ្លួនស្រីស្នំប៉ុណ្ណោះ។ ជាក់ស្ដែង បើតាម ពូយី ដែលជាអធិរាជចុងក្រោយបង្អស់នៅរាជវង្សឈីង ទម្លាយក្នុងសៀវភៅ memoirs របស់ទ្រង់បានឱ្យដឹងថា គ្មានទីតាំងណាមួយនៅ Forbidden City ហៅឈ្មោះថា ដំណាក់ត្រជាក់ នោះឡើយ។ ពាក្យ ដំណាក់ត្រជាក់ គឺជាពាក្យប្រើប្រាស់ទូទៅសម្រាប់សម្គាល់ទីតាំងដែលឃុំខ្លួនស្រីស្នំប៉ុណ្ណោះ។ វាមិនមែនជាដំណាក់អចិន្ត្រៃយ៍តែជាបន្ទប់ណាមួយដែលគេប្រើប្រាស់ទុកឃុំស្រីស្នំ។ អ្វីដែលគេសម្គាល់ទូទៅថាជា «ដំណាក់ត្រជាក់» គឺវាមានទីតាំងដាច់ដោយឡែក និង ដាច់ឆ្ងាយពីគេ មិនមានការជួសជុលឡើងវិញ ហើយនឹងឃ្លាតឆ្ងាយខ្លាំងពីរាជដំណាក់ធំ៕

ប្រភព៖ VTC News