រស់នៅម្នាក់ឯងក្នុងសង្កាត់ Minhang ក្រុងសៀងហៃ ប្រទេសចិន ស្ត្រីចំណាស់វ័យ ៧០ ឆ្នាំម្នាក់ ត្រូវបានឱ្យដឹងថាគាត់ចូលចិត្តប្រមូលសំរាមពីខាងក្រៅយកមកគរទុកនៅក្នុងផ្ទះរាប់ឆ្នាំរហូតពូនណែនដូចភ្នំរកតែផ្លូវដើរមិនបាន។ មិនត្រឹមតែប៉ុណ្ណឹង លោកយាយថែមទាំងបានជួលបន្ទប់ចំនួន ២ បន្ថែមក្នុងតម្លៃ ៤៥០០ យ័ន (ប្រមាណជាង ៦០០ ដុល្លារ) ក្នុងមួយខែ ដើម្បីទុកដាក់របស់របរផ្ទាល់ខ្លួនរបស់គាត់ ប៉ុន្តែបន្ទប់ទាំងនោះក្រោយមកក៏ក្លាយទៅជាកន្លែងដាក់សំរាមដូចគ្នា។ ស្ថានភាពរស់នៅរបស់លោកយាយបានធ្វើឱ្យអ្នកជិតខាងទ្រាំទ្រទៀតលែងបានរហូតទាក់ទងទៅខាងអាជ្ញាធរក្នុងតំបន់ឱ្យជួយ។
តាមសារព័ត៌មាន Red Star News និង Chao News លោកយាយចំណាស់ខាងលើជាអ្នកមនុស្សរស់នៅសន្សំសំចៃណាស់ ប៉ុន្តែគាត់ក៏ងប់ងល់ខ្លាំងជាមួយនឹងសំរាមផងដែរ។ តាមការបញ្ជាក់ពីកូនប្រុសរបស់គាត់បានឱ្យដឹងថា ម្ដាយរបស់គាត់បានចាយប្រាក់ ៤៥០០ យ័នក្នុងមួយខែដើម្បីតែជួលបន្ទប់ទុកដាក់សំរាមដែលគាត់ប្រមូលមកនោះ។ សំរាមគរពេញក្នុងផ្ទះ ហើយរាល់ពេលបើកទ្វារម្ដងៗ សំរាមធ្លាក់ចុះមកដូចទឹកជ្រោះ។
ខាងអ្នកគ្រប់គ្រងសហគមន៍បានចុះទៅពិនិត្យមើលផ្ទះលោកយាយនោះ ២ ដងក្នុងមួយសប្ដាហ៍ដើម្បីដោះស្រាយបញ្ហានេះ។ មិនថាព្រឹកមិនថាយប់ លោកយាយតែងយករបស់ដែលរើសបានយកមកទុកក្នុងផ្ទះ ហើយទោះបីខាងសហគមន៍ និង អ្នកគ្រប់គ្រង និយាយប្រាប់យ៉ាងណាក៏ដោយ គាត់តែងតែនិយាយថាគាត់យកវាទៅលក់ ប៉ុន្តែគាត់មិនដែលធ្វើឡើយ។
កូនប្រុសរបស់លោកយាយបានបញ្ជាក់ទៀតថា ខ្លួន និង ប្រពន្ធបានជួយសម្អាតផ្ទះរបស់ម្ដាយ ៣ ដងរួចមកហើយតាំងពីឆ្នាំ ២០១៤ ប៉ុន្តែនៅតែដដែល។ ដោយឡែក ឥលូវនេះខាងអាជ្ញាធរ ប៉ូលិស និង អ្នកគ្រប់គ្រងសហគមន៍ ក៏បានសហការគ្នាដើម្បីធ្វើការសម្អាតទ្រង់ទ្រាយធំមួយដោយមានបុគ្គលិកជាង ៤០ នាក់មកជួយ។ ប្រតិបត្តិការបោសសម្អាតផ្ទះស្ត្រីចំណាស់រូបនេះដែរ បានចំណាយពេល ២ ថ្ងៃ ប្រមូលសំរាមសរុប ៣០ តោន ចាយរថយន្តដឹកសំរាមដល់ទៅ ៧ គ្រឿងទើបដឹងអស់។
ក្រោយសំរាមបោសសម្អាតរួចរាល់ដោយជោគជ័យ ខាងប៉ូលិស និង កូនប្រុសរបស់លោកយាយ បាននាំគាត់ទៅមន្ទីរពេទ្យដើម្បីពិនិត្យមើលបញ្ហាផ្លូវចិត្ត ហើយក៏រកឃើញថាគាត់មានជំងឺផ្លូវចិត្តស្រួចស្រាល និង បានចេញថ្នាំឱ្យគាត់លេបរួមទាំងទទួលការព្យាបាលបន្ថែម ប៉ុន្តែយ៉ាងណា លោកយាយគឺបានបដិសេធមិនព្រមទទួលការព្យាបាលនោះឡើយ។
រឿងរ៉ាវរបស់លោកយាយខាងលើ គឺជាឧទាហរណ៍មួយនៃការកើនឡើងបញ្ហាប្រមូលរបស់របរយកមកស្តុកទុកដែលឧស្សាហ៍កើតមានលើមនុស្សចាស់នៅក្នុងប្រទេសចិន។ បញ្ហានេះដែរជាញឹកញាប់គឺផ្សារភ្ជាប់ទៅនឹងភាពឯកោ ជំងឺថប់បារម្ភ និង ជំងឺផ្លូវចិត្ត។ ក្រុមវេជ្ជបណ្ឌិតប្រចាំមជ្ឈមណ្ឌលសុខភាពផ្លូវចិត្តក៏បានកត់សម្គាល់ដែរថា ការងប់ងល់នឹងការប្រមូលរបស់របរនេះគឺអាចក្លាយទៅជាជំងឺផ្លូវចិត្តខ្លាំងប្រសិនបើមិនអាចគ្រប់គ្រងវាបាន៕
