Zhang Linghe តារាសម្ដែងប្រុសវ័យ ២៧ ឆ្នាំ ដែលផ្ទុះប្រជាប្រិយភាពក្នុងរឿង «Love Between Fairy and Devil» «My Journey to You» និង «The Princess Royal» បច្ចុប្បន្នកំពុងក្លាយជាកំពូលតារាសម្ដែងដ៏មានឥទ្ធិពលម្នាក់ក្នុងប្រទេសចិន។ យ៉ាងណាមិញ ភាពល្បីល្បាញខ្លាំងមួយនេះបែរជានាំឱ្យរូបលោកជួបប្រទះការលំបាកដល់ខ្លួនឯងទៅវិញ។
ជាក់ស្ដែង កាលពីថ្ងៃទី ០៨ ខែសីហា ឆ្នាំ ២០២៥ កន្លងទៅ តារាប្រុស Linghe បានធ្វើដំណើរទៅកាន់ទីក្រុង Changsa ដើម្បីចូលរួមកម្មវិធីមួយនៅថ្ងៃបន្ទាប់ ប៉ុន្តែ រូបលោកគឺត្រូវបានអ្នកគាំទ្រងប់ងល់តាមជាប់ រកឃើញទីតាំងសណ្ឋាគារដែលលោកស្នាក់នៅ ហើយថែមទាំងចែកចាយព័ត៌មាននេះបន្តលើបណ្ដាញសង្គមទៀត។
មិនយូរប៉ុន្មាន នៅពីមុខសណ្ឋាគារដែលលោកស្នាក់នៅនោះ ក៏ឃើញមានអ្នកគាំទ្រច្រើនសន្ធឹកនាំគ្នាប្រមូលផ្ដុំកកុញ។ ក្រុមការងាររបស់តារាប្រុស Linghe អស់ជម្រើស ក៏សម្រេចផ្លាស់ប្ដូរទៅសណ្ឋាគារផ្សេង ហើយបើតាមរបាយការណ៍ទទួលបាន ត្រឹមមួយយប់នោះ Linghe ត្រូវប្ដូរសណ្ឋាគារស្នាក់នៅរហូតដល់ទៅ ៥ ដង។
ដល់ថ្ងៃកម្មវិធី មនុស្សជាច្រើនក៏ឃើញកកកុញផងដែរ មុនវត្តមានរបស់ Linghe មកដល់។ ទិដ្ឋភាពអ្នកគាំទ្រឈរចាំនៅក្រៅអគារ មើលទៅប្រៀបដូចជាទិដ្ឋភាពក្នុងរឿងហ្សំប៊ី។
ក្រោយភាពវឹកវរ និង បញ្ចប់កម្មវិធីដោយជោគជ័យ Linghe ក៏បានធ្វើការបង្ហោះលើបណ្ដាញសង្គមផ្ទាល់ខ្លួនរបស់លោកដើម្បីឱ្យអ្នកគាំទ្រស្ងប់ចិត្តដែរថា៖ «ធ្វើឱ្យគ្រប់គ្នាពិបាកហើយ។ សុវត្ថិភាពជាចម្បង ជួបអ្នកទាំងអស់គ្នាពេលក្រោយទៀត»៕
ប្រភព៖ 8days
