ក្រុមហ៊ុន Nestlé បានប្រកាសបណ្តេញនាយកប្រតិបត្តិក្រុមហ៊ុនចេញពីតំណែងភ្លាម ក្រោយរកឃើញថារូបលោកបានលួចមានទំនាក់ទំនងស្នេហាជាមួយជំនួយការផ្ទាល់ខ្លួន។
កាលពីពេលថ្មីៗនេះ ក្រុមហ៊ុនយក្សរបស់ស្វីសដែលជាជាម្ចាស់ម៉ាកផលិតផលល្បីៗជាច្រើនដូចជា Kitkat និង Nespresso នោះ បានប្រកាសថា លោក Laurent Freixe ដែលជា CEO ក្រុមហ៊ុន ត្រូវបានដកតំណែងហើយ ក្រោយការស៊ើបអង្កេតដឹកនាំដោយផ្ទាល់ពីប្រធានក្រុមហ៊ុន និង អ្នកដឹកនាំឯករាជ្យ ពាក់ព័ន្ធនឹងការលួចលាក់មានស្នេហាជាមួយបុគ្គលិកខ្លួនឯងខុសក្រមសីលធម៌ក្រុមហ៊ុន។
លោក Paul Bulcke ដែលជាប្រធានក្រុមហ៊ុនបាននិយាយថា៖ «នេះគឺជាការសម្រេចចិត្តដ៏ចាំបាច់មួយ។ តម្លៃ និង អភិបាលកិច្ចរបស់ Nestle គឺជាមូលដ្ឋានគ្រឹះដ៏រឹងមាំនៃក្រុមហ៊ុនរបស់យើង។ ខ្ញុំសូមអរគុណដល់ Laurent សម្រាប់ការបំពេញការងារជាច្រើនឆ្នាំនៅក្រុមហ៊ុន Nestle»។
គួរបញ្ជាក់ថា បើតាមសេចក្ដីប្រកាសរបស់ក្រុមហ៊ុន Nestle លោក Philipp Navratil ដែលជាប្រធាននៃផលិតផល Nespresso នឹងឡើងកាន់តំណែងជំនួសលោក Laurent Freixe៕
ប្រភព៖ 9GAG
