ករណីបុរសម្នាក់ត្រកូល Jiao ក្លែងខ្លួនបន្លំធ្វើជាស្ត្រី និង ដាក់ឈ្មោះថា ហុង ទៅល្បួងបោកប្រាស់មនុស្សប្រុសវ័យក្មេងចំនួន ១៦៩១ នាក់ កំពុងក្លាយជាប្រធានបទក្ដៅគគុកបំផុតលើបណ្ដាញសង្គម Weibo ក្នុងប្រទេសចិន។ យ៉ាងណាមិញ បុរសរូបនោះចុងក្រោយត្រូវបានប៉ូលិសចាប់ឃាត់ខ្លួន ក្រោយរូបភាព និង វីដេអូអាសអាភាសជាច្រើនត្រូវបានចែកចាយពាសពេញប្រព័ន្ធអនឡាញ។
តាមសារព័ត៌មាន HK01 ជនរងគ្រោះរបស់ស្ត្រីក្លែងក្លាយ ហុង មានរាប់ចាប់ពីសិស្សសាលា បុគ្គលិកការិយាល័យ គ្រូបង្វឹកហាត់ប្រាណ ប្រុសសង្ហាៗលើបណ្ដាញសង្គមជាច្រើន ហើយជាមួយគ្នានោះដែរ ក្រោយអត្តសញ្ញាណនៃប្រុសៗដែលជាជនរងគ្រោះរបស់ ហុង ត្រូវបានបែកធ្លាយ ក៏ស្រាប់តែមានការបង្ហោះមួយលើបណ្ដាញសង្គមចិនលើកឡើងថា តារាចម្រៀង Jay Chou សង្ស័យជាម្នាក់ក្នុងចំណោមបុរសដែលត្រូវ ហុង បោកប្រាស់រាងកាយ។
ព័ត៌មាននេះដែរគឺផ្ទុះការភ្ញាក់ផ្អើលខ្លាំងមែនទែនក្នុងវិស័យកម្សាន្តនៅប្រទេសចិន តែយ៉ាងណាមិញ មិនទុកឱ្យផ្ទុះផ្អើលយូរ តារាប្រុស Jay Chou ក៏ទទួលបានភាពស្អាតស្អំមកវិញ ដោយមហាជនជាច្រើនក្នុងប្រទេសចិនបានរកឃើញថា blogger ដែលចែកចាយព័ត៌មាននោះ គឺមានបំណងបង្កើតរឿងក្លែងក្លាយឡើងដើម្បីតែចង់បាន views។ រូបគេបានប្រើប្រាស់រូបភាពរបស់បុរសម្នាក់ដែលទៅផ្ទះរបស់ ហុង មានពុកមាត់ស្រដៀងនឹង Jay Chou ដើម្បីបំភាន់ភ្នែកសាធារណជន ទាំងដែលការពិតនោះ Jay Chou គឺមិនមែនជាជនរងគ្រោះក្នុងបញ្ជីមនុស្សប្រុសជាង ១ ពាន់នាក់នោះឡើយ។
ពាក់ព័ន្ធនឹងការចែកចាយព័ត៌មានក្លែងក្លាយនេះដែរ ខាងតារាចម្រៀងប្រុស Jay Chou គឺមិនទាន់ចេញមកឆ្លើយតបនោះឡើយ។ ដោយឡែក មហាជនក៏ដូចជាអ្នកគាំទ្រតារាចម្រៀងប្រុសរូបនេះជាច្រើនបង្ហាញការខឹងសម្បា និង ថ្កោលទោសចំពោះទង្វើរបស់ blogger រូបនោះដែលទាញផលប្រយោជន៍ពីព័ត៌មានក្ដៅដោយការបំភ្លៃព័ត៌មានបង្ខូចកេរ្តិ៍ឈ្មោះគេបែបនេះ។ ពួកគេក៏ស្នើឱ្យ Jay Chou ចាត់វិធានការខ្លាំងក្លា និង ប្ដឹងជនទាំងនោះដែលបង្ខូចឈ្មោះលោកផងដែរ៕
ប្រភព៖ Kenh14
