មហាជនអ្នកគាំទ្រដែលបានទស្សនាភាពយន្តខ្នាតធំខ្មែរ រឿង «ភ្លើងឆេះក្លឹបក្រោមដី» របស់ផលិតកម្ម LD ច្បាស់ជាបានស្គាល់ហើយពីតួអង្គឈ្មោះពិសី ដែលជាតួអង្គត្រូវបានព្រាយចូលសណ្ឋិតនោះ កំពុងផ្ទុះការចាប់អារម្មណ៍ខ្លាំងពីទេពកោសល្យសម្ដែងដ៏ប៉ិនប្រសប់របស់នាងជាតួព្រាយ ទាំងទឹកមុខ ទាំងកាយវិការសមខ្លាំងក្នុងសាច់រឿងនេះ។
តួអង្គពិសី ដែលមហាជនកំពុងចែករំលែកលើបណ្ដាញសង្គមភាគច្រើនហៅថា តួព្រាយ នេះដែរ បើនិយាយពីជីវិតក្រៅសាច់រឿងវិញ នាងត្រូវបានគេស្គាល់ថាជាតារាសម្ដែងស្រីពន្លកថ្មីមានឈ្មោះថា ជា សោភា ដែលកំពុងក្ដោបបានប្រជាប្រិយភាព និង ទទួលបានការសរសើរខ្លាំងពីស្នាដៃនៃការសម្ដែងរបស់នាង ក្នុងវិស័យសម្ដែងភាពយន្តខ្មែរជាច្រើនកន្លងមក។ រីឯរូបសម្រស់វិញ ដ្បិតតែឃើញដើរតួសមខ្លាំងនឹងរឿងបែបកាចៗមែន ប៉ុន្តែតារាស្រីរូបនេះ នៅក្រៅមានរូបរាងស្រស់ស្អាត មុខមាត់មានមន្តស្នេហ៍គួរឱ្យស្រឡាញ់ខ្លាំង។
លើសពីនេះ ជា សោភា មុននឹងឈានជើងចូលវិស័យសម្ដែងនេះដែរ នាងក៏ជាប់ឈ្មោះជាស្រីស្អាតមួយរូប ដែលមានតំណែងជាធីតាឯកសង្រ្កាន្តរងទី ១ រដូវកាលទី ៣ ដែលតំណាងជាតួទេពធីតាមួយអង្គក្នុងឆ្នាំ ២០២២ កន្លងទៅទៀតផង៕
