ព្រឹកមិញមិនដល់ ១ ម៉ោង សំបុត្រប្រគំតន្ត្រី 2NE1 នៅកម្ពុជាត្រូវលក់អស់ ហ្វេនខ្លះទិញមិនទាន់សេដដល់ថ្នាក់ថាចង់ទៅលក់ទឹកអំពៅ ពងទាកូន នៅថ្ងៃខន់សឺត

អ្នកគាំទ្រក្រុមតារាចម្រៀង K-Pop ល្បីល្បាញរបស់ប្រទេសកូរ៉េខាងត្បូង 2NE1 ច្បាស់ជាបានជ្រាបមកហើយពីការវិលត្រឡប់ជាក្រុមជាថ្មីរបស់សមាជិកទាំង ៤ បន្ទាប់ពីរំសាយក្រុមអស់រយៈពេលជាច្រើនឆ្នាំ។

ក្នុងការវិលត្រឡប់នេះដែរ 2NE1 បានបង្ហាញវត្តមានក្នុងការប្រគំតន្ត្រីទេសចរ តាមបណ្តាប្រទេសមួយចំនួនរួចហើយដែរ។ យ៉ាងណាមិញ អ្វីដែលកាន់តែរំភើបសម្រាប់អ្នកគាំទ្រកម្ពុជានោះ នៅថ្ងៃទី ០៥ ខែកក្កដា ឆ្នាំ ២០២៥ ខាងមុខនេះ ក្រុមចម្រៀង K-Pop ដ៏ល្បីខាងលើនេះ នឹងមានវត្តមានក្នុងការសម្តែងនៅក្នុងប្រទេសកម្ពុជាក្នុងការប្រគំតន្ត្រី GANZBERG SUPER IDOL- I AM THE BEST។

ជាក់ស្តែង ក្រោយការរង់ចាំអស់រយៈពេលជាច្រើនឆ្នាំរបស់អ្នកគាំទ្រកម្ពុជា នៅព្រឹកថ្ងៃទី ១០ ខែមិថុនា ឆ្នាំ ២០២៥ នេះ សំបុត្រនៃការប្រគំតន្ត្រីខាងលើបានដាក់លក់ជាផ្លូវការ ដោយមិនដល់ ១ ម៉ោងផង គ្រប់ប្រភេទសំបុត្រទាំងអស់បានលក់គ្មានសល់ ដែលធ្វើឱ្យអ្នកទិញមិនបានមានការខូចចិត្តជាខ្លាំង។ លើសពីនោះ ហ្វេនខ្លះសេដដល់ថ្នាក់លេបខាយសម្តីថាចង់ទៅលក់ទឹកអំពៅ និង ពងទាកូន ពេលខន់សឺតលេងទៀតផង៕