ជារឿងដ៏គួរឱ្យភ្ញាក់ផ្អើល និង នឹកស្មានមិនដល់ នៅវេលាម៉ោង ៨ និង ១០ នាទី ថ្ងៃទី ២៩ ខែតុលា ឆ្នាំ ២០២៥ មានករណីគេប្រទះឃើញបុរសម្នាក់ សង្ស័យពុលពងគីង្គក់ បានដេកស្លាប់នៅនឹងផ្ទះម្នាក់ឯង ស្ថិតនៅចំណុចភូមិឫស្សីក្រោក ឃុំឫស្សីក្រោក ស្រុកមង្គលបុរី ខេត្តបន្ទាយមានជ័យ។
តាមប្រភពព័ត៌មានបានឱ្យដឹងថា ជនរងគ្រោះមានឈ្មោះ ឃុត រតនា ភេទប្រុស អាយុ ៣៤ ឆ្នាំ រស់នៅភូមិឫស្សីក្រោក ឃុំឫស្សីក្រោក ស្រុកមង្គលបុរី ខណៈបើតាមការបំភ្លឺរបស់ក្មេងប្រុស-ស្រី អាយុ ១០ ឆ្នាំពីររូបមានឈ្មោះ ជុំ ច្រិប ភេទស្រី និង ឈ្មោះ វិន សុខលីន ភេទប្រុស រស់នៅជិតផ្ទះជនរងគ្រោះ បានរៀបរាប់ប្រាប់នគរបាលឱ្យដឹងថា ៖ «នៅថ្ងៃទី ២៨ ខែតុលា ឆ្នាំ ២០២៥ វេលាម៉ោង ១៦ និង ៣០ នាទី ពួកខ្ញុំបានឃើញពូ រតនា គាត់អង្គុយផឹកស្រាថ្នាំក្រោមផ្ទះម្នាក់ឯង ហើយពួកខ្ញុំឃើញមានសត្វគីង្គក់លោតមកជិតគាត់ គាត់ក៏បានចាប់គីង្គក់នោះបោក រួចគាត់យកទៅវះស្បែកចេញ ហើយគាត់វះពោះគីង្គក់នោះឃើញមានពង គាត់ក៏បានយកគីង្គក់នោះទៅអាំងហូបទាំងពងតែម្ដង ខណៈនោះពួកខ្ញុំបានស្រែកប្រាប់គាត់ថា ពូកុំហូបទាំងពងប្រយ័ត្នពុល តែគាត់នៅតែហូប ហើយពួកខ្ញុំក៏បានរត់ចេញមកដើរលេងបាត់ទៅ រហូតដល់ថ្ងៃទី ២៩ ខែតុលា ឆ្នាំ ២០២៥ វេលាម៉ោង ៨ និង ១០ នាទី ម្តាយខ្ញុំបានប្រាប់ខ្ញុំថា យប់មិញប្រហែលម៉ោង ១០ ជាងឮសំឡេង អារតនាវាក្អួតខ្លាំងៗ តែម្ដាយខ្ញុំមិនចាប់អារម្មណ៍ទេ ស្មានតែគាត់ស្រវឹងស្រាហើយក្អួតធម្មតា ទើបគាត់មិនបានចេញមកមើល ហើយគាត់ក៏ដេកវិញទៅ»។
តាមការបំភ្លឺបានបន្តថា ៖ «រហូតព្រឹកឡើងម៉ោង ៨ និង ១០ នាទី ម្ដាយខ្ញុំបានក្រោកមកមើលក៏ឃើញពូ រតនា ដេកក្រោមអង្រឹង ហើយម្ដាយខ្ញុំដើរទៅមើលឃើញគាត់ស្លាប់បាត់ទៅហើយ។ ខ្ញុំក៏បានប្រាប់ម្ដាយខ្ញុំថាពីម្សិលមិញខ្ញុំបានឃើញពូ រតនា គាត់ចាប់គីង្គក់អាំងហូបទាំងពង ប្រហែលគាត់ពុលពងគីង្គក់ស្លាប់ហើយម៉ែ ហើយម៉ែរបស់ខ្ញុំក៏បានរាយការណ៍ប្រាប់អាជ្ញាធរតែម្ដង (សូមបញ្ជាក់ជនរងគ្រោះរស់នៅផ្ទះម្នាក់ឯង ជាមនុស្សញៀនស្រា)»។
យ៉ាងណាមិញ ករណីនេះបើតាមការសន្និដ្ឋានរបស់គណៈកម្មការត្រួតពិនិត្យសព យោងតាមការសាកសួរបំភ្លឺនៅកន្លែងកើតហេតុ និង តាមការត្រួតពិនិត្យ និង ស្រាវជ្រាវរបស់មន្រ្ដីជំនាញ និង ក្រុមការងារ ព្រមទាំងការបញ្ជាក់ពីលោកគ្រូពេទ្យ សុខា មុនិញ គ្រូពេទ្យកោសល្យវិច័យស្រុក ក្នុងការពិនិត្យលើសព បានសន្និដ្ឋានបឋមថា ជនរងគ្រោះពិតជាស្លាប់ដោយសារហូបពងគីង្គក់បណ្ដាលឱ្យពុលស្លាប់ពិតមែន ខណៈសព ត្រូវប្រគល់ជូនទៅក្រុមគ្រួសារដើម្បីយកទៅធ្វើបុណ្យតាមប្រពៃណី៕
ប្រភព ៖ Nokorwat News Daily
