ចំពោះបវរកញ្ញា ងិន ម៉ារ៉ាឌី ដ្បិតតែមួយរយៈក្រោយនេះ អ្នកនាងបានវិលត្រឡប់មកបំពេញការងារសិល្បៈ និង វិស័យបវរកញ្ញាវិញមែន ប៉ុន្តែនាងក៏ធ្លាប់បង្ហើបប្រាប់ទាក់ទងនឹងរឿងជីវិតឯកជន ដែលពេលនេះកំពុងត្រៀមខ្លួនចេញទៅរស់នៅក្រៅប្រទេសជាមួយស្វាមី និង ចាប់អាជីពថ្មីមួយនៅទីនោះទៀតផង។
ក្រោយពីបង្ហើបរឿងត្រៀមខ្លួនចេញទៅរស់នៅក្រៅប្រទេស និង ចាប់អាជីពថ្មីមួយ ថ្មីៗកន្លងទៅនេះ អ្វីកាន់តែចាប់អារម្មណ៍ចំពោះជីវិតឯកជនរបស់បវរកញ្ញា ងិន ម៉ារ៉ាឌី ទៀត ខណៈបានឃើញអ្នកនាងបង្ហាញក្ដីរំភើបចំពោះការខិតខំសម្រេចក្ដីស្រមៃរបស់ខ្លួន ដែលអ្នកនាងបានរៀនជំនាញថ្មីដ៏ពេញនិយមមួយទាក់ទងនឹងវិស័យក្រចក គឺជំនាញធ្វើក្រចកបានយ៉ាងល្អ និង ជោគជ័យទទួលបានវិញ្ញាបនបត្របញ្ជាក់ការសិក្សារថែមទៀត។
ដោយឡែក មិនត្រឹមរៀនជំនាញវិស័យក្រចកយ៉ាងជោគជ័យ ដើម្បីត្រៀមប្រកបអាជីពនៅក្រៅប្រទេសនោះទេ មកដល់ថ្មីៗនេះ ក៏បានឃើញបវរកញ្ញា ងិន ម៉ារ៉ាឌី បានបង្ហាញសកម្មភាពចូលរួមប្រកួតតំណាងជាតិក្នុងកម្មវិធីលំដាប់អន្តរជាតិផ្នែកក្រចក Fantasy KBC Award 2025 និង ទទួលបានជ័យលាភីចំណាត់ថ្នាក់លេខ ២ ក្នុងការប្រកួតនេះទៀតផង។
ក្នុងនោះ អ្នកនាង ងិន ម៉ារ៉ាឌី បានបង្ហោះរៀបរាប់លើហ្វេសប៊ុកថា ៖ «ទីបំផុតកូនខ្មែរម្នាក់នេះអាចធ្វើបាន កាលពីយប់មិញការប្រកួតអន្តរជាតិផ្នែកក្រចកវែង fantasy 5 ម្រាម ចាក់ដោយដៃនៃម្សៅ Acrylic ខ្ញុំទទួលបានចំណាត់ថ្នាក់លេខ 2 ខ្ញុំតែងតែជឿថាក្មេងស្រីដែលមានក្តីសុបិននឹងក្លាយទៅជាមនុស្សស្រីដែលមានទស្សនវិស័យ។
អរគុណអ្នកគ្រូធំ Arrow Queen ដែលបានផ្តល់ឱកាសឱ្យខ្ញុំចូលប្រកួត វាជាទំព័រថ្មីមួយសម្រាប់ខ្ញុំក្នុងអាជីពនេះ ចាប់តាំងពីថ្ងៃដែលខ្ញុំឈាងជើងដើរចូលសាលា ខ្ញុំបានជឿជាក់រួចទៅហើយថា សាលានេះនឹងដឹកនាំខ្ញុំទៅកាន់ជំនាញមួយដែលខ្ញុំចង់បាន។
អរគុណអ្នកគ្រូបន្ទុកថ្នាក់ ដែលតែងតែអបអរពេលសិស្សទទួលបានជោគជ័យ អរគុណអ្នកគ្រូ សុធារ៉ាន់ សម្រាប់ការផ្តល់កម្លាំងចិត្ត អរគុណដល់មិត្តភក្តិខ្ញុំដូចគ្នា បងមាន បងមករា បងលីណា ដែល តស៊ូជាមួយគ្នារហូតមក អរគុណក្រុមគ្រួសារ ជាពិសេសម៉ាក់ខ្ញុំដែលបំផុសគំនិតក្នុងការធ្វើស៊ីក្លូនេះឡើង អរគុណ លោកប្តី ដែលតែងតែជឿជាក់ និង ទុកឱកាសឱ្យអូនក្នុងការសាងស្នាដៃជាច្រើនមុនពេលចាកចេញពីមាតុភូមិ ពាននេះ ជ័យជំនះនេះ មិនមែនសម្រាប់ខ្ញុំតែម្នាក់ទេ តែសម្រាប់ប្រជាជនប្រទេសកម្ពុជាយើង និង មាតុភូមិខ្ញុំ សិស្ស #TheQueennail ជំនាន់ទី 18»៕
សូមចុចទីនេះដើម្បីទស្សនាវីដេអូ៖
