មហាជននិយមតាមដានភាពយន្តរន្ធត់តាមបណ្តារោងកុន ច្បាស់ជាបានជ្រាបមកហើយពីការដាក់បញ្ចាំងរឿង «បូជាសពពោះធំ» ជារឿងពិត និង ផលិតដោយផលិតកម្មសាស្ត្រាភាពយន្ត ដែលរឿងនេះកំពុងផ្ទុះល្បីខ្លាំង។
តាមការឱ្យដឹង រឿង «បូជាសពពោះធំ» ត្រូវបានផលិតចេញឡើងពីសាច់រឿងពិត ផ្អែកទៅលើហេតុការណ៍ពិតពីអាចារ្យភ្លុក ដោយមានការចូលរួមសម្តែងពីតារាប្រុសស្រីល្បីៗជាច្រើន ក្នុងនោះតួឯកស្រីសម្តែងដោយបវរកញ្ញា រី ស្រីនេត និង តួអង្គប្រុសសម្តែងដោយលោក វ៉ាន់ ដេវីត។
យ៉ាងណាមិញ ក្រោយពីការបញ្ចាំងអស់រយៈពេលប្រមាណជាង ១ សប្តាហ៍មកហើយនោះ កាលពីថ្ងៃទី ៣០ ខែមេសា ឆ្នាំ ២០២៥ កន្លងទៅ អ្នកស្រី ប៊ុន ចាន់និមល ម្ចាស់ផលិតកម្មសាស្រ្តាហ្វៀម បានចេញមកបង្ហោះសំណេរមួយបង្ហាញរឿងរ៉ាវមួយចំនួននៅពីក្រោយនៃការផលិតរឿង «បូជាសពពោះធំ» បន្ទាប់ពីមានមតិមួយចំនួនបានលើកឡើងទាក់ទងនឹងស្តង់ដារភាពយន្តនេះ។
ជាការពិត អ្នកស្រី ប៊ុន ចាន់និមល រៀបរាប់ថា ៖ «តើមានមនុស្សប៉ុន្មាននាក់នៅខាងក្រោយភាពយន្ត «បូជាសពពោះធំ»? បងប្អូនដឹងទេថា ទម្រាំផលិតបានភាពយន្តខ្នាតធំរឿង «បូជាសពពោះធំ» មកបញ្ចាំងនៅគ្រប់រោងភាពយន្តដូចពេលនេះ តើមានការរួមចំណែកពីមនុស្សប៉ុន្មាននាក់? ហើយពួកគាត់ជានរណាខ្លះ? ទម្រាំផលិតបានភាពយន្តខ្នាតធំរឿង «បូជាសពពោះធំ» នេះ មានមនុស្សច្រើនណាស់ ដែលបានប្រឹងប្រែងយ៉ាងហត់នឿយ ទាំងថ្ងៃទាំងយប់។
រាប់ដំបូងពី ប្អូនអាចារ្យភ្លុក ដែលជាអ្នកចែករំលែកសាច់រឿង និង ជាអ្នកប្រឹក្សាយោបល់ក្នុងការផលិត។ បន្ទាប់មកមានអ្នកនិពន្ធ អ្នកដឹកនាំរឿង តួសម្ដែង អ្នកដឹកនាំផ្នែកសិល្បៈ (Art Director) ជំនួយការដឹកនាំរឿង អ្នកស្វែងរកទីតាំង អ្នកគ្រប់គ្រងប្លង់ថត អ្នកថត អ្នកបច្ចេកទេសសំឡេង អ្នកបច្ចេកទេសភ្លើង អ្នករៀបចំឆាក អ្នកផាត់មុខ អ្នករៀបចំសម្លៀកបំពាក់ អ្នករត់ការទូទៅ អ្នកបើកបរ អ្នកគ្រប់គ្រង Files អ្នកកាត់ត អ្នករចនាក្រាហ្វិច វិស្វករសំឡេង អ្នកនិពន្ធតន្ត្រី អ្នកនិពន្ធចម្រៀង អ្នកចម្រៀង អ្នកបច្ចេកទេស3D អ្នករចនា Poster អ្នកធ្វើទីផ្សារ និង អ្នកចែកចាយ។
បើនិយាយជារួមទៅ ទាំងក្រុមការងារគ្រប់ផ្នែក និង តួសម្ដែង មានមនុស្សយ៉ាងហោចណាស់ ១៤០ នាក់ បានរួមចំណែកក្នុងការផលិតរឿង «បូជាសពពោះធំ» នេះឡើង។ គ្រប់គ្នាសុទ្ធតែបានប្រឹងប្រឹងដោយមិនខ្លាចហត់នឿយ ទាំងយប់ទាំងថ្ងៃ និង បានឆ្លងកាត់ឧសគ្គជាច្រើនរាប់មិនអស់។ ទម្រាំផលិតបានភាពយន្តមួយមកចាក់បញ្ចាំង មិនមែនជារឿងងាយស្រួលនោះទេ។ ដូចនេះហើយទើបគ្រប់គ្នាចាត់ទុកស្នាដៃនេះជាមោទនភាពដ៏ធំ ដែលពួកគាត់សម្រេចបាន»។
ជាចុងក្រោយ ចាងហ្វាផលិតកម្មសាស្ត្រាហ្វៀម ក៏បានបន្ថែមថា ៖ «នាងខ្ញុំមានតែអរគុណ ចំពោះការប្រឹងប្រែងនេះ។ សូមអរគុណប្អូន អាចារ្យភ្លុក និង ក្រុមការងារគ្រប់ផ្នែក រួមតួសម្ដែងទាំងអស់ ដែលបានប្រឹងប្រែងបង្កើតស្នាដៃនេះឲ្យលេចចេញជារូបរាងឡើង។ ខ្ញុំមានមោទកភាពចំពោះអ្នករាល់គ្នា»៕
