នៅថ្ងៃទី ១៨ ខែសីហា ឆ្នាំ ២០២៥ នេះ មានករណីអ្នកស្រុកបានប្រទះឃើញគ្រឿងញៀនជិត ១០០ គីឡូក្រាម អណ្តែតពេញទឹកប្រឡាយមួយកន្លែង ស្ថិតក្នុងខេត្តសាមុតសុងក្រាម ប្រទេសថៃ។
តាមព័ត៌មានបានឱ្យដឹងថា ប្រឡាយមួយនេះ ស្ថិតនៅតាមបណ្តោយផ្លូវក្នុងភូមិលេខ១ ឃុំខ្លងឃើន ស្រុកមឿង ខេត្តសាមុតសុងក្រាម។ ក្នុងនោះក្រោយពីបានប្រទះឃើញបែបនេះ ប្រជាជនបានរាយការណ៍ទៅកាន់ប៉ុស្តិ៍នគរបាលភ្លាម ហើយខាងអាជ្ញាធរក៏បានចុះមកអន្តរាគមន៍ត្រួតពិនិត្យ ហើយក៏ឃើញថាជាថ្នាំញៀនប្រភេទមេតំហ្វេតាមីន សរុបចំនួន ៨៧ គីឡូក្រាមឯណោះ រួចក៏បានប្រមូលទុកជាភស្តុតាងនៅប៉ុស្តិ៍នគរបាល។
យ៉ាងណាមិញ ខាងអាជ្ញាធរបានរកឃើញថា គ្រឿងញៀនទាំងអស់នេះ គឺជារបស់ជនជាប់ចោទជួញដូរគ្រឿងញៀនមួយរូបវ័យ ៣១ ឆ្នាំ ដែលទើបតែចាប់ខ្លួនកាលពីថ្មីៗកន្លងទៅ ដោយបានលួចលាក់ទុកគ្រឿងញៀនចំនួន ២១០ គីឡូក្រាម និង កញ្ឆាចំនួន ៣៩០ គីឡូក្រាម ហើយចំណែកគ្រឿងដែលនៅក្នុងប្រឡាយនេះ ក៏ជារបស់បុរសនេះដែរ៕
ប្រភព៖ Khaosod
