ថ្មីៗនេះ អន្តរជាតិកំពុងផ្ទុះការចាប់អារម្មណ៍ខ្លាំង ជាមួយការដើរបង្ហាញម៉ូដម៉ាកសម្លៀកបំពាក់ដ៏ល្បីមួយនៅវៀតណាម ដែលជាម៉ាកល្បីលំដាប់សកល។ ចំណោមម៉ូឌែលដើរបង្ហាញម៉ូដ សុទ្ធតែជាតារាល្បីមកពីប្រទេសផ្សេងៗ ក្នុងនោះឃើញមានតារាពីប្រទេសកម្ពុជាយើងគឺ កញ្ញា អ៊ិន លក្ខិណា និង កញ្ញា ប៊ី សុធារី ក៏បានបង្ហាញវត្តមានលើវិថីបង្ហាញម៉ូដផងដែរ។
កម្មវិធីនេះជាការបង្ហាញខូឡិកហ្សិនថ្មី ពីម៉ាកហ្វេហ្សិនរបស់វៀតណាម LE THANH HOA ដែលធ្វើឡើងក្នុងខនសិប Golden Heritage កាលពីថ្ងៃទី ០២ ខែ មេសា ឆ្នាំ ២០២៥។ ជា Fashion Show ដ៏ប្រណីត ឆាកដើរបង្ហាញម៉ូដ ត្រូវបានតុបតែងអមនឹងរាងរៅប្រាសាទ ព្រមជាមួយវិថីដើរម៉ូដពណ៌ប្រាក់ ធ្វើឱ្យការដើរបង្ហាញមើលមកពិតជាខ្ពង់ខ្ពស់ ហើយអស្ចារ្យខ្លាំង។
ឈុតខូឡិកហ្សិន ដែលដើរបង្ហាញម៉ូដទាំងនេះត្រូវបានរចនាឡើង ដោយម្ចាស់ម៉ាកយីហោជាជនជាតិវៀតណាម គឺ លោក Le Thanh Hoa។ លោកបានបង្កើតម៉ាកនេះកាលពីឆ្នាំ ២០១២ ដោយដាក់ឈ្មោះរបស់លោកផ្ទាល់។ នៅវៀតណាម ម៉ាកនេះមានភាពល្បីល្បាញខ្លាំង ហើយសិល្បៈច្នៃម៉ូដរបស់លោកបានឆ្ពោះទៅដល់កម្រាលព្រំក្រហមសកលជាច្រើន។ ក្នុងនោះរាប់ទាំងកម្មវិធីពានរង្វាន់អូស្កា និង កម្មវិធី Cannes Film Festival។ ស្ទីលដ៏ unique ផ្ទាល់ខ្លួនរបស់លោកគឺ ការច្របាច់បញ្ចូលគ្នារវាងប្រពៃណី និង ស្ទាយ៌សហសម័យ៕
