អ្នកគ្រូ ណាលី ថាយុគ ៩ នេះ អ្នកចេះ អ្នកពូកែ មានភាពស្មោះត្រង់ កុំភ័យអត់ការងារធ្វើ តែបើអ្នកពូកែតែទ្រឹស្ដីអាចលំបាកហើយ

ជាទូទៅ ការផ្លាស់ប្ដូរយុគសម័យ តែងមានរយៈពេល ២០ ឆ្នាំម្ដង​ ដែលនាំឱ្យមានការផ្លាស់ប្ដូរឥរិយាបថនៃការរស់នៅ ក្នុងនោះ ចូលដល់ឆ្នាំ ២០២៤-២០២៥ នេះ ជាយុគថ្មី ដែលទើបតែផ្លាស់ប្ដូរ និង ឈានចូលមកដល់ ដែលត្រូវគេស្គាល់ថាយុគ ៩ ជាយុគភ្លើងផងដែរ។

ទាក់ទិនទៅនឹងយុគ ៩ នេះ  កាលពីកន្លងទៅនេះ អ្នកគ្រូហុងស៊ុយ ណាលី ដែលជាគ្រូហុងស៊ុយបែបវិទ្យាសាស្ត្រដ៏មានប្រជាប្រិយភាព បានចែករំលែកអំពីរឿងរ៉ាវក្នុងយុគ ៩ នេះ តាមរយៈគណនីរបស់អ្នកគ្រូដែលមានឈ្មោះ Naly Long បានឱ្យដឹងថា ៖ «យុគ ៩ ជាឱកាសមាសរបស់មនុស្សពូកែមានសមត្ថភាពពិតប្រាកដ និង ស្មោះត្រង់ កន្លែងណាក៏គេចង់បានដែរ។ អ្នកពូកែមានសមត្ថភាពពិត កុំភ័យអត់ការងារធ្វើ តែបើពូកែតែទ្រឹស្តី ហើយមិនមានភាពស្មោះត្រង់ទៀតនោះ យុគ ៩ នេះ គឺពិបាកហើយ»។

មិនត្រឹមតែប៉ុណ្ណោះ កន្លងមកអ្នកគ្រូណាលី ក៏ធ្លាប់បានលើកឡើងនូវការយល់ឃើញជាច្រើនអំពីយុគ ៩ ផងដែរដែលមានដូចជា ៖

– យុគ៩ ជាយុគដែលបង្ហាញសេចក្ដីពិត អ្នកសម្ដែងធ្វើល្អលាក់គេមិនជិតទេ ព្រោះយុគភ្លើងនឹងដុតបំភ្លឺបង្ហាញសេចក្ដីពិតគ្រប់យ៉ាង

– យុគ ៩ ជាយុគដែលមនុស្សល្អលេចធ្លោ ឯមនុស្សអាក្រក់ នឹងទទួលកម្មពៀរមិនចាំជាតិក្រោយឡើយ

– យុគ ៩ មិនមែនជាយុគដែល Support មនុស្សខូចទេ ហើយក៏ជាយុគបោសសំអាតមន្ត្រីខូចផងដែរ ចំណែកប្រជាជននឹងមានភាពសាមគ្គីគ្នាយ៉ាងល្អ៕