ថ្មីៗនេះ នៅប្រទេសថៃមានករណីការស្លាប់បុរសម្នាក់ ដែលបណ្តាលមកពីការធ្លាក់ដុំស៊ីម៉ងត៍ធំប៉ុនណាណីចំកញ្ចក់ឡានផ្នែកខាងមុខ បង្កឱ្យរងរបួសធ្ងន់ធ្ងរ ដល់ថ្នាក់សង្រ្គោះជីវិតមិនបាន។
តាមព័ត៌មានបានឱ្យដឹងថា ហេតុការណ៍ខាងលើ បានកើតឡើងកាលពីថ្ងៃទី ២៩ ខែមេសា ឆ្នាំ ២០២៥ កន្លងទៅ ស្ថិតនៅចំណុចផ្លូវព្រះរាម ២។ ដោយបុរសរងគ្រោះមានវ័យ ៤៩ ឆ្នាំ បានបើកឡានមួយបាំងកន្លះ ឆ្លងកាត់កន្លែងខាងលើ ស្រាប់តែមានដុំស៊ីម៉ងត៍ធ្លាក់ចេញពីស្ពាននៅក្បែរនោះមកចំ បណ្តាលឱ្យធ្លុះកញ្ចក់ឡាន សង្កត់មួយទំហឹងទៅលើបុរសរងគ្រោះ បណ្ដាលឱ្យមានរបួសធ្ងន់ធ្ងរលើរាងកាយ ហើយក៏ត្រូវបានគេបញ្ជូនទៅមន្ទីរពេទ្យ។
យ៉ាងណាមិញ ខាងគ្រូពេទ្យបានឱ្យដឹងថាបុរសជាជនរងគ្រោះមានការបែកថ្លើម និង មានឈាមហូរនៅក្នុងពោះ ក្នុងនោះខាងគ្រូពេទ្យបានព្យាយាមវះកាត់សង្រ្គោះជីវិតដែរ តែជាអកុសលមិនអាចជួយបានឡើយ។ ចុងក្រោយបុរសជាជនរងគ្រោះ ក៏បានបាត់បង់ជីវិតនៅឯមន្ទីរពេទ្យក្នុងថ្ងៃកើតហេតុដដែលតែម្តង៕
ប្រភព៖ MATICHON
