បើគិតមកដល់ពេលនេះ រយៈពេលប្រមាណជិត ១ ខែ ហើយ ដែលអតីតតារាសម្តែងប្រុស លោក ស៊ុក សុភា បានឃើញមុខកូនប្រុសពៅជាទាយាទទី ៦ ក្នុងគ្រួសារ បន្ទាប់ពីភរិយា គឺអ្នកនាង Sarina Lucky Luy បានសម្រាលបុត្រកាលពីថ្ងៃទី ១៣ ខែឧសភា ឆ្នាំ ២០២៥ កន្លងទៅ។
ក្នុងនោះដែរ កូនប្រុសពៅរបស់លោក ស៊ុក សុភា និង ភរិយា មានមុខមាត់គួរឱ្យស្រឡាញ់ខ្លាំងកាត់រកបងៗ និង ប៉ាម៉ាក់ រីឯឈ្មោះវិញក៏ពីរោះ ដោយប៉ាម៉ាក់បានដាក់ឈ្មោះថា Lucas។
យ៉ាងណាមិញ ក្រោយពីភរិយាបានសម្រាលបុត្រហើយនោះ លោក ស៊ុក សោភា បានបំពេញតួនាទីជាស្វាមីដ៏ល្អ ដោយមហាជនបានឃើញលោកតែងបង្ហាញរូបភាពមើលថែកូនតូចជំនួសភរិយា ដោយងើបឆុងទឹកដោះគោឱ្យកូនប្រុសពៅញុំារៀងរាល់យប់ ជំនួសភរិយា។
លើសពីនោះ រៀងរាល់យប់ បើទោះជាអត់ងងុយជួយមើលថែកូនប្រុសយ៉ាងណាក្តី ព្រឹកឡើង លោក ស៊ុក សុភា ក៏បានបំពេញតួនាទីជាមេគ្រួសារដ៏ល្អដូចគ្នាដែរ ដោយលោកបន្តមើលការខុសត្រូវក្នុងហាងអាហារក្នុងនាមជាថៅកែផង និង ចុងភៅទៀត៕
