មហាជននិយមតាមដាន ពីសុខភាពរបស់កុមារា ឆលី ច្បាស់ជាបានជ្រាបហើយ ពីស្ថានភាពជំងឺរបស់ ឆលី បន្ទាប់ពីវះកាត់ដុំសាច់ក្នុងខួរក្បាលបានប្រមាណ ២ ខែ កន្លះ តែត្រូវដុះឡើងវិញ។ លើសពីនោះ អ្វីកាន់តែរន្ធត់ គ្រូពេទ្យប្រចាំរបស់ ឆលី បញ្ជាក់ថា ឆលី មិនអាចបន្តការព្យាបាលទៀតបានទេ បានត្រឹមប្រើប្រាស់ថ្នាំដើម្បីរក្សាពេលវេលារស់នៅជាមួយគ្រួសារ និង បងប្អូនមួយរយៈពេលប៉ុណ្ណោះ។
ក្នុងនោះដែរ ក្រោយទទួលដំណឹងរបស់កូនប្រុសដ៏អព័ភ្វហើយនោះ ក្រុមគ្រួសាររបស់ ឆលី គឺមិនបោះបង់ក្តីសង្ឃឹមឡើយ ដោយប៉ាម៉ាក់របស់ ឆលី បានស្វះស្វែងរកមធ្យោបាយ និង មន្ទីរពេទ្យក្រៅប្រទេសផ្សេងទៀត ដើម្បីព្យាបាលកូនប្រុស ដោយចុងក្រោយប៉ាម៉ាក់ ឆលី បានសម្រេចនាំ ឆលី ទៅព្យាបាលនៅប្រទេសម៉ាឡេស៊ី។
ជាក់ស្តែង កាលពីថ្ងៃទី ៣០ ខែមិថុនា ឆ្នាំ ២០២៥ កន្លងទៅនេះ ឆលី បានធ្វើដំណើរទៅដល់ប្រទេសម៉ាឡេស៊ីហើយ ដោយទៅដល់ភ្លាម ឆលី ក៏បានទៅកាន់មន្ទីរពេទ្យភ្លាមដែរ។ នេះបើតាមការឱ្យដឹង នៅលើផេកផ្លូវការរបស់ ឆលី ដែលមានប៉ាម៉ាក់ជាអ្នកកាន់។
យ៉ាងណាមិញ កាលពីថ្ងៃទី ០៦ ខែកក្កដា ឆ្នាំ ២០២៥ កន្លងទៅ អ្នកតាមដាន ស្រឡាញ់ ឆលី បានបង្ហាញក្តីរំភើបយ៉ាងខ្លាំង ខណៈផេកផ្លូវការរបស់ ឆលី បានឱ្យដឹងថា ឆលី អាចបញ្ចូលកោសិកាដើម្បីព្យាបាលបានហើយ។
ក្នុងនោះ ផេក ឆលី បានឱ្យដឹងថា៖ «ដំណឹងដ៏រំភើប! ដុកទ័របានធ្វើតេស្តប៊ូមឈាមតាំងពីថ្ងៃទី ៣០ ចុងខែ ៦ របស់ ឆលី ថាឈាមអូន គឺអាចបញ្ចូលកោសិកា Natural Killer cell បានហើយ។ មួយរយៈនេះ អូនឃ្លានណាស់ សុំញុំារហូត ដុកទ័រក៏បានប្រាប់ដែរថា ឆលី គឺវិវត្តសរីរាង្គឡើងវិញ ដូច្នេះហើយធ្វើឱ្យឆលីឃ្លានខ្លាំងជាងមុន សង្ឃឹមថាកូនមានសុខភាពល្អ និង យកឈ្នះជំងឺកាចសាហាវមួយនេះ។ អ៊ំពូមីងមើលៗមុខអូនលូវម៉ាប់ៗខ្លះៗហើយ»៕
