នៅថ្ងៃទី ២១ ខែសីហា ឆ្នាំ ២០២៥ អគ្គ.ការពារអ្នកប្រើប្រាស់ កិច្ចការប្រកួតប្រជែង និង បង្ក្រាបការក្លែងបន្លំ បានជូនដំណឹងពីករណី ចុះត្រួតពិនិត្យទំនិញដែលមានហានិភ័យ ដែលបានដឹកតាមរថយន្តក្រុង ១ គ្រឿង នៅថ្ងៃទី ២០ ខែសីហា ឆ្នាំ ២០២៥ ក្រោមការដឹកនាំ និង សម្របសម្រួលដោយលោក សាយ វាសនា ព្រះរាជអាជ្ញារងខេត្តកំពង់ធំ រួមទាំងមន្រ្តីសាខា ក.ប.ប. ខេត្តកំពង់ធំ សហការជាមួយ មន្រ្តីនៃមន្ទីរពាណិជ្ជកម្មខេត្តកំពង់ធំ មន្រ្តីនៃរដ្ឋបាលជលផលខេត្តកំពង់ធំ និង នគរបាលប្រឆាំងបទល្មើសសេដ្ឋកិច្ចខេត្តកំពង់ធំ។
តាមប្រភពបានបន្តឱ្យដឹងថា បន្ទាប់ពីត្រួតពិនិត្យរថយន្តក្រុង ១ គ្រឿងខាងលើ អ្នកជំនាញរកឃើញមានទំនិញដែលមានហានិភ័យ ដែលមានដូចជា ត្រីសាលម៉ុន ចំនួន ១៤០ កេស ស្មើនឹង ៣០១០ គីឡូក្រាម គឿងក្នុងសត្វមាន់ ចំនួន ២១០ កេស ស្មើនឹង ២៥២០ គីឡូក្រាម ទឹកស៊ីអ៊ីវ ចំនួន ១០០ ប៊ីដុង ស្មើនឹង ៤០០ លីត្រ វ៉ាសាប៊ិ ចំនួន ២ កេស ស្មើនឹង ១០០ គីឡូក្រាម សរុបចំនួន ៥,៦៣០ គីឡូក្រាម និង ៤០០ លីត្រ។
ជាលទ្ធផល ក្រោយពីមន្រ្តីជំនាញធ្វើការត្រួតពិនិត្យ បានរកឃើញថាទំនិញទាំងអស់ត្រូវបានខូចគុណភាព គឺដោយសារការដឹកជញ្ជូន និង ការរក្សាទុក ពុំត្រឹមត្រូវតាមលក្ខខណ្ឌតម្រូវផ្នែកបច្ចេកទេស ហេតុនេះព្រះរាជអាជ្ញារងក៏បានអនុញ្ញាតឱ្យរឹបអូសដើម្បីធ្វើការកម្ទេចចោលទៅតាមនីតិវិធី៕
