អស់រយៈពេលជាងមួយសតវត្សរ៍ ដែលម៉ាកហ្វេហ្សិនដ៏ល្បីរបស់បារាំង Louis Vuitton បានផ្តោតផលិតតែសម្លៀកបំពាក់ គ្រឿងលម្អកាយ និង របស់ប្រើប្រាស់ប្រណីត។ យ៉ាងណាមិញ មកដល់ថ្ងៃនេះ ម៉ាកនេះ បានបោះជំហានមួយកម្រិតទៀត ទៅក្នុងវិស័យសម្រស់ ដោយបញ្ចេញគ្រឿងសម្អាងតុបតែងមុខ ខណៈដែលម៉ាកល្បីៗដទៃ គេបានលុកលុយទីផ្សារក្នុងវិស័យនេះជាច្រើនឆ្នាំមកហើយ។
បើនិយាយពីម៉ាក Louis Vuitton ដំបូងឡើយនៅក្នុងឆ្នាំ ១៨៥៤ វាបានបញ្ចេញកាបូបយួរដៃម្យ៉ាងសម្រាប់អ្នកដំណើរ ហៅថា trunks។ ក្រោយមកចាប់ពីឆ្នាំ ១៩២០ វាបានបញ្ចេញកាបូបដាក់គ្រឿងផាត់មុខ ក្រាសសិតសក់ ទឹកអប់ រហូតដល់សម្លៀកបំពាក់ គ្រឿងលម្អកាយ និង របស់របរប្រើប្រាស់ផ្សេងៗ។ អាចថា Louis Vuitton បានចាប់អារម្មណ៍ក្នុងវិស័យសម្រស់យូរមកហើយ តែទើបតែថ្ងៃនេះ រយៈកាលប្រមាណ ១៧១ ឆ្នាំ ទើបចាប់ផ្តើមបង្កើតផលិតផលតុបតែងមុខ មកប្រជែងនៅលើទីផ្សារ។
ជាក់ស្តែង កាលពីថ្ងៃទី ២៩ ខែ សីហា ឆ្នាំ ២០២៥ ម៉ាក Louis Vuitton បានសម្ពោធខូឡិកហ្សិនគ្រឿងផាត់មុខដំបូងរបស់ខ្លួន ឈ្មោះថា La Beauté Louis Vuitton collection។ ក្នុងនោះមានដូចជា ក្រែមលាបមាត់, Balm និង ពណ៌ផាត់ភ្នែក ដែលមកជាមួយកាបូបស្បែកដាក់គ្រឿងផាត់មុខដ៏ប្រណីត។
សម្រាប់ក្រែមលាបមាត់ បានចេញចំនួន ៥៥ ពណ៌ ក្នុងនោះមាន ២៧ ពណ៌ ជាប្រភេទគ្រីមសាច់សាទីន ( creamy satin) និង ២៨ ពណ៌ជាប្រភេទស្ងួត (matte)។ ចំណែក Balm មាន ១០ ពណ៌ ពណ៌ស្តើងជាងពណ៌ក្រែម។ ហើយសម្រាប់ពណ៌ផាត់ភ្នែកវិញ មកជាប្រអប់ មាន ៨ ពណ៌ក្នុងប្រអប់តែមួយ៕
