មកដល់ពេលនេះ រយៈពេលជិត ១ សប្ដាហ៍ហើយ ដែល Miss Supranational Cambodia 2025 កញ្ញា ឈុំ ចាន់ដារ៉ា កំពុងស្ថិតក្នុងកងប្រកួតលើឆាកអន្តរជាតិ Miss Supranational 2025 នៅឯប្រទេសប៉ូឡូញ ដែលនាងបានត្រៀមខ្លួនយ៉ាងមោះមុតស្វាហាប់ ក្នុងការតំណាងកម្ពុជាលើឆាកដ៏អស្ចារ្យនេះ។
ស្របពេលបវរកញ្ញា ឈុំ ចាន់ដារ៉ា កំពុងស្ថិតក្នុងកងប្រកួតនេះដែរ ក្រឡេកមើលមហាជនលើបណ្ដាញកំពុងផ្ទុះចែករំលែកខ្លាំង ក្រោយពីបានឃើញស្ថាប័ន Miss Supranational Cambodia បង្ហោះប្រកាសយ៉ាងភ្ញាក់ផ្អើលជុំវិញរឿងវីដេអូ Introduction របស់បវរកញ្ញា ឈុំ ចាន់ដារ៉ា ដែលស្ថាប័នបានសម្រេចចិត្តធ្វើការលុបចោលវិញ ព្រោះក្នុងវីដេអូនោះមានចំណុចខ្លះមិនអាចបង្ហោះបាន ព្រមទាំងបានសុំអភ័យទោសចំពោះកំហុសអចេតនា ដែលបានកើតជាបញ្ហានេះឡើង។
ក្នុងនោះ ស្ថាប័ន MSC បានរៀបរាប់ថា ៖ «យើងបានសម្រេចចិត្តលុបវីដេអូ introduction របស់ ដារ៉ា ដោយសារមានវីដេអូប៉ុន្មានវិនាទី ដែលយើងមិនអាចផុសបាន យើងខ្ញុំក៏សូមទោសនៅកំហុសខុសឆ្គង ដែលកំហុសនេះជាកំហុសអចេតនា ដែលយើងមិននឹកស្មានថាវាក្លាយជារឿងវែងឆ្ងាយ ព្រោះគោលបំណងយើងមួយ គឺដើម្បីបង្ហាញថាខ្មែរខ្លាំង ខ្មែរមានអ្វីដែលអស្ចារ្យតែប៉ុណ្ណោះ»។
តាមរយៈការបង្ហោះចែករំលែក និង វែកញែកពីមហាជនលើបណ្ដាញសង្គម ក៏បានឱ្យដឹងថាមូលហេតុដែលស្ថាប័នសម្រេចលុបវីដេអូនេះ គឺពាក់ព័ន្ធនឹងវីដេអូរាំរបាំគ្រុឌបែបសហសម័យ ដែលបវរកញ្ញា ឈុំ ចាន់ដារ៉ា ត្រៀមសម្រាប់សម្ដែងបង្ហាញ Talent លើឆាកអន្តរជាតិនោះ គឺមិនមានការសុំអនុញ្ញាតពីម្ចាស់ដើម ដែលជាហេតុធ្វើឱ្យម្ចាស់របាំនេះពុំបានអនុញ្ញាតឱ្យយកទៅបង្ហាញ រីឯ Talent សម្រាប់ត្រៀមបង្ហាញនេះ ក៏ត្រូវឱ្យបវរកញ្ញាប្ដូរថ្មីវិញផងដែរ។
យ៉ាងណាមិញ ជុំវិញការវែកញែកពីមហាជន ក៏ដូចជាអ្នកគាំទ្រលើហ្វេសប៊ុកនេះដែរ ក៏ពុំទាន់ឃើញខាងស្ថាប័ន និង ខាងម្ចាស់កម្មសិទ្ធិរបាំ ចេញបកស្រាយច្បាស់ៗថារឿងរ៉ាវបែបណាឡើយ ដោយពេលនេះលើហ្វេសប៊ុកឃើញមហាជនបន្តចែករំលែកបញ្ចេញមតិវែកញែករៀងៗខ្លួន៕
