ដំណើរការច្នៃម៉ូដ ការបង្កើតខូឡិកហ្សិន និង ការដើរបង្ហាញម៉ូដប្រចាំរដូវកាល កើតឡើងពីប្រភពហ្វេហ្សិនសម្លៀកបំពាក់មួយហៅថា Haute Couture។ Haute Couture គឺជាហ្វេហ្សិនដែលពិសេសបំផុត ខ្ពង់ខ្ពស់បំផុត ហើយក៏ជាភាពអស្ចារ្យនៃការបង្ហាញសម្លៀកបំពាក់ប្រណីតផ្តាច់មុខផងដែរ។ បិតាបង្កើត Haute Couture គឺ លោក Charles Frederick Worth ជាជនជាតិអង់គ្លេស កើតនៅឆ្នាំ ១៨២៥ និង មរណភាពនៅឆ្នាំ ១៨៩៥។ លោកបានបង្កើត House of Worth ជាក្រុមហ៊ុនធ្វើសម្លៀកបំពាក់ Haute Couture នៅក្នុងឆ្នាំ ១៨៥៨ ដែលមានទីតាំងស្ថិតនៅលើវិថី rue de la Paix ក្នុងទីក្រុងប៉ារីស។
អ្នកបង្កើត Haute Couture ដំបូងគេរូបនេះ ត្រូវបានគេទទួលស្គាល់ និង អនុវត្តតាមគំរូអាជីវកម្ម ដោយរកលុយតាមរបៀបច្នៃម៉ូដសម្លៀកបំពាក់បង្កើតជាខូឡិកហ្សិនដាក់លក់។ ជាក់ស្តែង លោកបានបង្កើតការបង្ហាញខូឡិកហ្សិនមួយហៅថា «Salon Shows» ធ្វើឡើងនៅ House of Worth ដោយអញ្ជើញភ្ញៀវមកទស្សនាម៉ូដសម្លៀកបំពាក់ដែលមានការបង្ហាញដោយម៉ូឌែល។ លក្ខណៈពិសេសនៃសម្លៀកបំពាក់របស់លោក គឺលោកធ្វើតែមួយខូឡិកហ្សិនដែលមានភាព unique បំផុត ហើយក្នុងមួយឈុតៗមានតែមួយប៉ុណ្ណោះ។ គោលបំណងបង្កើត Show នេះ មិនត្រឹមតែបង្ហាញពីសិល្បៈច្នៃប្រតិដ្ឋរបស់លោកប៉ុណ្ណោះទេ តែថែមទាំងផ្តោតចម្បងក្នុងការស្វែងរកអតិថិជន និង លក់ខូឡិកហ្សិនផងដែរ។
Salon Shows ធ្វើឡើងនៅ House of Worth ត្រូវគេបានកត់ត្រាជាការបង្ហាញហ្វេហ្សិនដំបូងបំផុតនៅក្នុងប្រវត្តិសាស្ត្រ។ ចំពោះរបៀបលក់ខូឡិកហ្សិន លោក Charles Frederick Worth អនុញ្ញាតឱ្យភ្ញៀវធ្វើការជ្រើសរើសឈុតដែលត្រូវចិត្ត កាលណាភ្ញៀវសម្រេចចិត្តទិញហើយ លោកនឹងបញ្ចេញឬបញ្ចូលឈុតឱ្យត្រូវទៅតាមរាងរៅរបស់ពួកគេ។ របៀបនេះវាខុសប្លែកទាំងស្រុងពីសម្លៀកបំពាក់ Ready-to-wear ដែលម៉ូដចេញមកមានលក្ខណៈទូទៅ និង មានទំហំស្រាប់ៗ។
ក្រោយការបង្ហាញ Show នេះ លោក Charles Frederick Worth ចាប់ផ្តើមមានគំនិតរៀបចំកម្មវិធីហ្វេហ្សិនដែលធ្វើឡើងពីរដងក្នុងមួយឆ្នាំ។ កម្មវិធីនៅគ្រានោះ ភ្ញៀវអាចមកជួបជុំគ្នានៅទីក្រុង ដែលលោក Charles Frederick Worth មានឱកាសបានបង្ហាញខូឡិកហ្សិនថ្មីសម្រាប់លក់ផង រីឯភ្ញៀវក៏បានធ្វើខ្លួនស្លៀកពាក់ប្លែកៗចូលរួមកម្មវិធីបង្អួតគ្នាផងដែរ។ នេះហើយជាដើមចមនៃការកកើតជាកម្មវិធី Fashion Week ដែលមនុស្សទូទាំងពិភពលោកតែងតែតាមដាន និង អនុវត្តរបៀបតគ្នាមកដល់សព្វថ្ងៃ។ អាចថាជារួម លោក Charles Frederick Worth បានបង្កើតរបៀបដែលឧស្សាហកម្មហ្វេហ្សិនដំណើរការដូចសព្វថ្ងៃ ហើយក៏បង្កើតរបៀបដែលអ្នកច្នៃម៉ូដអនុវត្តបង្កើតខូឡិកហ្សិនរបស់ពួកគេ។
បន្ទាប់ពី Haute Couture នៅជំនាន់លោក Charles Frederick Worth ឈានមកដល់សតវត្សរ៍ទី ២០ គេចាប់ផ្តើមឃើញមានការបង្កើតក្រុមហ៊ុនសម្លៀកបំពាក់ប្រណីតនៅក្នុងអាណាចក្រហ្វេហ្សិន។ ក្នុងនោះរួមមាន៖ Christian Dior, Chanel, Balenciaga, Schiaparelli, Saint Laurent និង Givenchy។ ពួកគេជាចំណោមក្រុមហ៊ុនផលិតសម្លៀកបំពាក់ ដែលបានធ្វើឱ្យហ្វេហ្សិននៅក្រុងប៉ារីសមានភាពរស់រវើកបំផុត។ ជាពិសេស ពួកគេបានបង្កើតកម្មវិធីហ្វេហ្សិន Haute Couture និង រៀបចំរចនាសម្ព័ន្ធហ្វេហ្សិនដោយយកគំនិតតាម លោក Charles Frederick Worth ផងដែរ។ នេះហើយជាដើមហេតុដែលកម្មវិធីបង្ហាញសម្លៀកបំពាក់ Couture តែងតែធ្វើឡើងនៅទីក្រុងប៉ារីស បេះដូងនៃទឹកដីកំណើតរបស់ Haute Couture តែម្តង។
បើទោះបិតា Haute Couture លោក Charles Frederick Worth បានលាចាកពីលោកនេះជាងមួយសតវត្សរ៍ទៅហើយក្តី ប៉ុន្តែក្រុមហ៊ុនរបស់លោកនៅតែមានរូបរាងដល់សព្វថ្ងៃ ដោយស្ថិតនៅក្រោមការដឹកនាំរបស់អ្នកច្នៃម៉ូដជំនាន់ថ្មី។ សម្រាប់សម្លៀកបំពាក់ Haute Couture វាលែងជាប្រភពចំណូលរបស់ក្រុមហ៊ុនទៀតហើយ អ្វីដែលក្រុមហ៊ុនផ្តោតចំពោះ Haute Couture គឺ កេរ្តិ៍ឈ្មោះ តម្លៃ ក៏ដូចជាអត្តសញ្ញាណរបស់ម្ចាស់ដើម។ បច្ចុប្បន្ន ក្រុមហ៊ុនរកចំណូលបានច្រើនតាមរយៈការលក់អាជ្ញាបណ្ណ និង បង្កើតផលិតផលប្រណីតដូចជា ស្បែកជើង កាបូប និង ទឹកអប់ជាដើម៕
ប្រភព៖ glamobserver
