ថ្វីបើមិនមែនជាអ្នកចម្រៀងអាជីព ប៉ុន្តែយុវជនមុខមាត់សង្ហាដូចតារាកូរ៉េ Tonghor អាចច្រៀងបានយ៉ាងពីរោះ ហើយលោកថែមទាំងអាចលេងហ្គីតាអម ដោយមិនចាំបាច់ចាក់តន្ត្រីច្រៀងនោះទេ។ ជាក់ស្តែង លោកច្រើនយកបទមនោសញ្ចេតនាមកច្រៀង Cover ហើយបទនីមួយៗទៀតសោត លោកច្រៀងផង លេងឧបករណ៍តន្ត្រីផង ស្តាប់មកធម្មជាតិ លន្លង់លន្លោច ជក់ចិត្តជាខ្លាំង។
ជាមួយការ Cover បទចម្រៀងបែបចាក់ដោតអារម្មណ៍ វីដេអូរបស់លោកដែលបង្ហោះរឿយៗនៅលើបណ្តាញសង្គម មិនថា Facebook, Instagram ឬ TikTok សុទ្ធសឹងទទួលបានការចាប់អារម្មណ៍ខ្លាំង អ្នកចូលមើលរាប់ K ជាពិសេសត្រូវចិត្តចង្កោមយុវវ័យ។ នៅលើទំព័រ Facebook លោកក៏បានដាក់បង្ហាញដែរថា លោកគឺជាអ្នក Cover បទចម្រៀង, ជាអ្នកធ្វើមាតិកា Lifestyle និង ជា Vlogger មួយរូបផងដែរ។
ក្រៅពីប្រជាប្រិយភាពនៅលើបណ្តាញសង្គម ងាកមកជីវិតឯកជនវិញ បើតាមគណនី LinkedIn កំលោះ Tonghor បានបញ្ចប់ការសិក្សាផ្នែកពាណិជ្ជកម្មអន្តរជាតិ និង ដឹកជញ្ជូន ពីសាកលវិទ្យាល័យ Paragon International University។ លោកធ្លាប់មានបទពិសោធការងារខាងផ្នែកទីផ្សារ ក្នុងវិស័យបដិសណ្ឋារកិច្ច ហើយបច្ចុប្បន្ន ក្រៅពីជាអ្នកគ្រប់គ្រងទូទៅនៅក្រុមហ៊ុមផលិតផលអាហារដ៏លេចធ្លោមួយ លោកក៏លេចធ្លោជាអ្នកលក់ផលិតផលអនឡាញមួយរូបផងដែរ៕
