នៅថ្ងៃទី ១៨ ខែកក្កដា ឆ្នាំ ២០២៥ នេះ ក្រុមបាតុករទាំង ៣ ក្រុមធំៗនៅក្នុងប្រទេសថៃ បានចោទប្រកាន់ថាកម្ពុជាអ្នកដាក់គ្រាប់មីននៅតំបន់មុំបី បណ្តាលឱ្យគ្រោះថ្នាក់ដល់ទាហានថៃអស់ ៣ នាក់ ហើយបានដាក់លិខិតស្នើទាមទារឱ្យក្រសួងការបរទេសរបស់ខ្លួន ហៅអគ្គរាជទូតខ្មែរនៅថៃទៅជួបថ្កោលទោស ព្រមទាំងដាក់ពាក្យបណ្តឹងទៅកាន់អង្គការសហប្រជាជាតិ។
យ៉ាងណាមិញ ជុំវិញរឿងរ៉ាវខាងលើនោះដែរ គេបានឃើញប្រជាជនកម្ពុជាចេញមកប្រតិកម្ម និង ខ្លះបង្ហាញការហួសចិត្តជាខ្លាំងថាដើរជាន់ខ្លួនឯងមកបន្ទោសគេ ទង្វើខ្លួនឯងធ្វើមិនទទួលស្គាល់ គិតតែរកល្បិចចោទទម្លាក់កំហុសមកកម្ពុជា។
ជាក់ស្តែង ក្រឡេកទៅមើលតារាភាពយន្តល្បីឈ្មោះ លោក យុត្ថារ៉ា ឆានី ក៏បានបង្ហាញការឈឺឆ្អាលនឹងរឿងការចោទប្រកាន់របស់ថៃ ព្រមទាំងបានបង្ហោះសារចោទជាសំណួរដែរថា៖ «សួរតែមួយម៉ាត់ថា តើជាន់មីននៅក្នុងដែនអធិបតេយ្យប្រទេសណា? ហែងឆ្លើយឱ្យច្បាស់! ១៖ បើក្នុងដែនអធិបតេយ្យកម្ពុជានោះ តើទាហានសៀម មានសាច់ការស្អី វង្វេងខួរអីបានមកដើររុករុលក្នុងដីខ្មែរ? ២៖ បើក្នុងដែនអធិបតេយ្យសៀម នោះយើងប្រាប់ទៅវិញថា ទាហានខ្មែរមានសច្ចៈ ធ្វើអីធ្វើទល់មុខ មិនមែនចរិតកំសាកញីដូចចោរសៀមទេ ហើយក៏គ្មានពេលទំនេរទៅបែកថ្នាំរង្វេងដី យកមីនទៅកប់ក្នុងព្រៃសៀមនោះទេ!»៕
