ការលាឈប់ពីការងារ មុន និង ក្រោយ គង់តែដល់វេនគ្រប់គ្នា គ្រាន់តែយូរ និង ឆាប់ ហើយក៏ទៅតាមហេតុផលរៀងៗខ្លួន។ តែយ៉ាងណាមិញ ករណីបុគ្គលិកឈប់បន្តបន្ទាប់គ្នារយៈពេលខ្លី ជាពិសេសបុគ្គលិកល្អៗ វាអាចជាភាពមិនប្រក្រតី ដែលអ្នកដឹកនាំគួរប្រញាប់រកឫសគល់។
បុគ្គលិកឈប់បន្តបន្ទាប់គ្នា វាជាសញ្ញាមួយដែលបង្ហាញថា ស្ថាប័នរបស់អ្នកកំពុងប្រឈមនឹងបញ្ហាធ្ងន់ធ្ងរ ដែលតម្រូវឱ្យមានការវាយតម្លៃ និង កែតម្រូវជាបន្ទាន់។ បុគ្គលិកឈប់បន្តបន្ទាប់គ្នា មិនមែនដោយសារតែមូលហេតុតែមួយមុខទេ តែវាជាការរួមផ្សំនៃកត្តាជាច្រើន។
ខាងក្រោមនេះគឺជាមូលហេតុចម្បងៗ ៦ យ៉ាង ដែលនាំឱ្យបុគ្គលិកល្អៗសម្រេចចិត្តចាកចេញពីក្រុមហ៊ុន៖
១. ភាពជាអ្នកដឹកនាំ និង ទំនាក់ទំនង
កត្តាដែលគេរកឃើញញឹកញាប់បំផុតគឺ “បុគ្គលិកមិនចាកចេញពីការងារទេ ពួកគេចាកចេញពីចៅហ្វាយ”។
* អ្នកដឹកនាំមិនល្អ៖ ដូចជា ការខ្វះតម្លាភាព ការដឹកនាំដោយគ្មានទស្សនៈវិស័យច្បាស់លាស់ ភាពមិនទៀងត្រង់ ឬ ការបង្កើតជម្លោះផ្ទៃក្នុង។
* ខ្វះការទទួលស្គាល់ និង ការលើកទឹកចិត្ត: បុគ្គលិកខិតខំធ្វើការអស់ពីសមត្ថភាព តែមិនដែលទទួលបានពាក្យសរសើរ ការលើកទឹកចិត្ត ឬ រង្វាន់សមរម្យសម្រាប់ស្នាដៃរបស់ពួកគេ។
* ទំនាក់ទំនងមិនល្អជាមួយមិត្តរួមការងារ: ការបែកបាក់សាមគ្គី ឬ មានជម្លោះផ្ទៃក្នុងដែលអ្នកដឹកនាំមិនដោះស្រាយឱ្យទាន់ពេល។
២. បញ្ហាប្រាក់កម្រៃ និង ផលប្រយោជន៍
* ប្រាក់ខែទាបជាងទីផ្សារ: ប្រសិនបើបុគ្គលិកមានសមត្ថភាពខ្ពស់ ពួកគេនឹងស្វែងរកកន្លែងដែលផ្ដល់ប្រាក់ខែសមរម្យទៅនឹងជំនាញរបស់ពួកគេ។
* អត្ថប្រយោជន៍មិនគ្រប់គ្រាន់: កង្វះការធានារ៉ាប់រងសុខភាព ថ្ងៃឈប់សម្រាកតិចតួច ឬ កង្វះប្រាក់រង្វាន់ដែលអាចប្រកួតប្រជែងបាន។
៣. ការងារហួសកម្លាំង និង សម្ពាធ
* ការប្រើបុគ្គលិកធ្វើការច្រើនជ្រុល: ការបង្ខំឱ្យបុគ្គលិកធ្វើការច្រើនម៉ោងជាប់ៗគ្នាដោយគ្មានការសម្រាកគ្រប់គ្រាន់ នាំឱ្យពួកគេអស់កម្លាំង និង បាត់បង់តុល្យភាពជីវិតការងារ។
* សម្ពាធការងារខ្លាំងហួសហេតុ: កាលបរិច្ឆេទកំណត់តឹងតែងពេក ឬ ការរំពឹងទុករបស់ក្រុមហ៊ុនខ្ពស់ហួសពីសមត្ថភាព ឬ ធនធានដែលពួកគេមាន។
៤. គ្មានឱកាសរីកចម្រើន
* ការជាប់គាំងក្នុងតំណែងដដែល: បុគ្គលិកមានអារម្មណ៍ថាគ្មានឱកាសក្នុងការដំឡើងតំណែង ឬ បង្កើនជំនាញ។
* គ្មានការបណ្ដុះបណ្ដាល: ក្រុមហ៊ុនមិនផ្ដល់កម្មវិធីបំប៉នជំនាញ ឬ ការអភិវឌ្ឍន៍វិជ្ជាជីវៈ ដែលធ្វើឱ្យបុគ្គលិកមានអារម្មណ៍ថា ចំណេះដឹងរបស់ពួកគេលែងរីកចម្រើន។
៥. បរិយាកាស និង វប្បធម៌ក្រុមហ៊ុន
* ប្រព័ន្ធគ្រប់គ្រងគ្មានភាពច្បាស់លាស់: ការគ្រប់គ្រងច្របូកច្របល់ ឬ គោលនយោបាយក្រុមហ៊ុនហួសសម័យ និង មិនបើកចំហរចំពោះការបញ្ចេញមតិយោបល់។
* ការប្រើបុគ្គលិកខុសជំនាញ: ការចាត់តាំងការងារដែលមិនត្រូវនឹងជំនាញ ឬ ចំណង់ចំណូលចិត្តរបស់បុគ្គលិក ធ្វើឱ្យពួកគេបាត់បង់ទឹកចិត្ត និង ផលិតភាព។
៦. កត្តាផ្ទាល់ខ្លួន
ទោះបីក្រុមហ៊ុនល្អឥតខ្ចោះយ៉ាងណាក៏ដោយ ក៏នៅតែមានបុគ្គលិកចាកចេញដោយសារ៖
* ផ្លាស់ទៅកន្លែងរស់នៅថ្មី។
* បន្តការសិក្សាថ្នាក់ខ្ពស់។
* ចាប់ផ្តើមអាជីវកម្មផ្ទាល់ខ្លួន។
ដើម្បីដោះស្រាយបញ្ហាបុគ្គលិកឈប់បន្តបន្ទាប់គ្នា អ្នកគួរតែរៀបចំ ការស្ទង់មតិលាឈប់ជាមួយបុគ្គលិកដែលចាកចេញ ដើម្បីប្រមូលព័ត៌មានពិតប្រាកដពីមូលហេតុដែលពួកគេសម្រេចចិត្តចាកចេញ៕
ប្រភព៖ ឯកសារច្បាប់ និង រដ្ឋបាល
