មេបក្សភូមិចៃថៃ ធ្លោយមាត់ថា រដ្ឋាភិបាលខ្មែរ ធ្វើឱ្យប្រជាជនចេះស្រឡាញ់ជាតិ តែរដ្ឋាភិបាលថៃ ទាល់តែប្រជាជនដាស់តឿន ទើបចេះស្រឡាញ់ជាតិ

ថ្មីៗនេះ លោក Anutin Charnvirakul ដែលជាប្រធានបក្សភូមិចៃថៃ បានបង្ហោះសម្តីគួរឱ្យហួសចិត្តមួយនៅតាមបណ្តាញសង្គមរបស់ខ្លួន ទាក់ទងនឹងបញ្ហានយោបាយក្នុងប្រទេស ដែលធ្វើឱ្យប្រជាជនថៃនាំគ្នាភ្ញាក់ខ្លួនព្រើត។

លោក Anutin បានបង្ហោះជាសារខ្លីថា ត្រូវហើយ រដ្ឋាភិបាលខ្មែរ បានធ្វើឱ្យប្រជាជនចេះស្រឡាញ់ប្រទេសជាតិ ចំណែកប្រជាជនថៃ នាំគ្នាដាស់តឿនរដ្ឋាភិបាលឱ្យចេះស្រឡាញ់ជាតិ។ នេះមានន័យថា ក្នុងកាលៈទេសៈនេះ រដ្ឋាភិបាលម្ពុជាបានធ្វើឱ្យប្រជាជនចេះរួបរួមសាមគ្គីគ្នាជាធ្លុងមួយ នឹងកាន់តែមានស្មារតីស្នេហាជាតិថែមមួយកម្រិតទៀត ចំណែកឯរដ្ឋាភិបាលថៃវិញ ក្នុងកាលៈទេសៈនេះ បែរជាធ្វើការធូររលុងរង្គោះរង្គើរ មិនសូវស្នេហាជាតិ ទាល់តែប្រជាជនជាអ្នកនាំគ្នាដាស់តឿនសតិទៅវិញ។

យ៉ាងណាមិញ នេះបង្ហាញយ៉ាងច្បាស់ថា រដ្ឋាភិបាលថៃ និង នយោបាយផ្ទៃក្នុងរបស់ថៃ ពិតជាស្ថិតក្នុងស្ថានភាពជ្រួលច្របល់ចលាចល រហូតដល់ប្រជាជនថៃខ្លួនឯងក៏អស់សង្ឃឹមនឹងរដ្ឋាភិបាលដែរ ដោយឡែក សម្រាប់ប្រទេសកម្ពុជាវិញ ប្រជាជនបានរួបរួមគ្នាបានល្អណាស់ ហើយក៏ជឿជាក់ក្នុងការដឹកនាំរបស់រដ្ឋាភិបាលយ៉ាងអស់ពីចិត្តដែរ៕

ប្រភព៖ Thairath