យោងតាមការសិក្សាស្រាវជ្រាវថ្មី ការផ្ញើឆាតរូប Emojis ទៅសង្សារ ឬគូស្នេហ៍ អាចជួយបង្កើនទំនាក់ទំនងប្រសើរឡើង ជាពិសេស នៅពេលដែលសង្សារ ឬគូស្នេហ៍ខឹង ឬមានបញ្ហាប៉ះទង្គិចគ្នា។
ជាក់ស្តែង អ្នកវិទ្យាសាស្ត្រអាមេរិកនិយាយថា ការប្រើប្រាស់រូបឌីជីថលតំណាងអារម្មណ៍ ឬ Emojis វាអាចជួយបង្កើតភាពស្និទ្ធស្នាលឡើងវិញ និង ការពេញចិត្តនៃទំនាក់ទំនង ដោយបំពេញលើការជួបមុខគ្នា។
អ្នកស្រាវជ្រាវមកពីសាកលវិទ្យាល័យ The University of Texas សហរដ្ឋអាមេរិក បានសិក្សាពីរបៀបដែល emojis មានឥទ្ធិពលលើការយល់ឃើញនៃទំនាក់ទំនងនៅក្នុងយុគសម័យ ដែលគ្រប់គ្រងដោយអន្តរកម្មតាមអ៊ីនធឺណែត។ គេបានឱ្យមនុស្សប្រមាណ ២៦៩ នាក់ ដែលមានអាយុចាប់ពី ២៣ ឆ្នាំ ដល់ ៦៧ ឆ្នាំ ផ្ញើសារគ្នាទៅវិញទៅមកចំនួន ១៥ សារ។ ក្នុងការផ្ញើសារ ពួកគេអាចផ្ញើជា emojis ក៏បាន ឬមិនបាច់ក៏បាន។
ជាលទ្ធផល ចំណោមអ្នកផ្ញើសារទាំងអស់ ភាគច្រើនពួកគេជ្រើសរើសការឆ្លើយតបជាមួយរូប emojis ទៅកាន់ដៃគូ ជាជាងការសរសេរអក្សរ។
អ្នកសិក្សាស្រាវជ្រាវឈ្មោះ Sally Huh បានលើកឡើងដែរថា ការឆ្លើយតបរបស់ដៃគូតាមរយៈការប្រើរូប emoji វាមានភាពវិជ្ជមានជាមួយភាពស្និទ្ធស្នាល និង ការពេញចិត្តចំពោះទំនាក់ទំនង។ អ្នកស្រាវជ្រាវរូបនេះបានភ្ញាក់ផ្អើលផងដែរ នៅពេលរូប emoji វាមិនខុសគ្នាឡើយពីការបង្ហាញអារម្មណ៍ដោយមុខផ្ទាល់។ ម្យ៉ាងទៀត ការប្រើ emoji វាមិនសូវមានកំហុសខ្លាំង។
ជារួម លោកថាការឆ្លើយតបដោយ emoji វាជាវិធីដ៏ល្អបំផុតសម្រាប់ទំនាក់ទំនងជាមួយដៃគូ។ ជាពិសេស នៅពេលដៃគូខឹង វាអាចជួយលួងលោមឬសម្រួលអារម្មណ៍ដៃគូឱ្យឆាប់ប្រសើរឡើង។ ហើយបើគូស្នេហ៍កំពុងល្អូកល្អឺន វានឹងធ្វើឱ្យទំនាក់ទំនងកាន់តែស្អិតរមួត។
បើតាមការសិក្សាមួយផ្សេងទៀត emojis មិនត្រឹមតែជាឧបករណ៍សម្រាប់បញ្ចេញមតិប៉ុណ្ណោះទេ តែវាថែមទាំងជាសញ្ញានៃការយកចិត្តទុកដាក់ចំពោះគ្នា និង ការភ្ជាប់អារម្មណ៍គ្នាផងដែរ៕
ប្រភព៖ NYP
