បើរំឭកដល់អតីតតារាប្រុស លោក ហង្ស ឈា ច្បាស់ជាមានមហាជនមួយចំនួនបានស្គាល់លោករួចមកហើយ ថាជាតារាសម្តែងមានប្រជាប្រិយភាពមួយរូបកាលពីអំឡុងឆ្នាំ ២០០០។
ក្នុងនោះ បើគិតមកដល់ពេលនេះ លោក ហង្ស ឈា ក៏បានរសាត់ឆ្ងាយពីអាជីពសិល្បៈប្រមាណជា ១៥ ឆ្នាំ មកហើយ បន្ទាប់ពីលោកបានចាកចេញពីប្រទេសកម្ពុជា សាងគ្រួសារ និង រស់នៅឯសហរដ្ឋអាមេរិក។ បច្ចុប្បន្ន លោក ហង្ស ឈា និង ភរិយា ទទួលបានចំណងដៃកូនប្រុស ១ រូប និង កូនស្រី ២ រូប ហើយ។
បើទោះជាចាកឆ្ងាយពីវិថីសិល្បៈក្តី កន្លងមក លោក ហង្ស ឈា ក៏ធ្លាប់បានមកលេងស្រុកកំណើតម្តងម្កាលផងដែរ ដោយរាល់ពេលមកប្រទេសកម្ពុជាម្តងៗ លោកក៏តែងតែចំណាយពេលជួបជុំអ្នកសិល្បៈដូចគ្នាដែរ។
ងាកទៅកាន់ជីវិតរស់នៅឯទឹកដីសហរដ្ឋអាមេរិកឯណោះវិញ មួយរយៈចុងក្រោយនេះ លោក ហង្ស ឈា ហាក់កាក់កប និង មមាញឹកក្នុងអាជីវកម្មរបស់លោក ដោយលោកបានបើកហាងលក់តែគុជយីហោ Boba Tea & Snow Ice House តាំងពីអំឡុងឆ្នាំ ២០១៨ មកម្ល៉េះ។ ក្នុងនោះ ក្រៅពីជាថៅកែហាងតែគុជខាងលើហើយ លោក ហង្ស ឈា ក៏បានពង្រីកអាជីវកម្មតាមរយៈការលក់ Frenchie និង ផ្គត់ផ្គង់លក់ផលិតផលតែគុជនៅទីនោះទៀតផង។
យ៉ាងណាមិញ ក្រោយពីមមាញឹកខ្លាំងលើការពង្រីកមុខជំនួយ ថ្មីៗនេះ លោក ហង្ស ឈា ក៏បានវិលមកបង្ហាញវត្តមានលើគណនីហ្វេសប៊ុករបស់លោកវិញហើយ ដោយលោកឆ្លៀតពេលធ្វើវីដេអូបង្ហាញពីការរស់នៅប្រចាំថ្ងៃ និង ណែនាំពីការរកស៊ីរបស់លោកទៀតផង៕
