ពិធីបុណ្យអុំទូកទើបរំលងផុតថ្មីៗ រីឯឱកាសបុណ្យចូលឆ្នាំសកលក៏ខិតជិតមកដល់ ជាពេលមួយដែលបងប្អូនខ្មែរមកជួបជុំ សប្បាយរីករាយជាមួយកម្មវិធីកម្សាន្តផ្សេងៗនៅទីក្រុងភ្នំពេញ។ សម្រាប់ស្ត្រីពពោះ ការដើរលេងទៅកន្លែងហ្វូងមនុស្សអាចប្រឈមហានិភ័យច្រើន ស្រួលមិនស្រួល អាចគ្រោះថ្នាក់ដោយហេតុណាមួយក៏ថាបាន។ ដើម្បីសុវត្ថិភាព និង នៅតែរក្សាបានសុខភាពល្អ យើងសូមលើកពីគន្លឹះ ៥ យ៉ាង ដែលម៉ាក់ៗនៅតែអាចរីករាយបាន។
១. ជៀសវាងចូលទៅក្នុងហ្វូងមនុស្ស
ឱកាសបុណ្យទាន កន្លែងជាច្រើននឹងមានការជួបជុំទៅដោយហ្វូងមនុស្ស បើស្ត្រីពពោះឆ្ពោះទៅកាន់កន្លែងនោះ ងាយប្រឈមនឹងការប្រជ្រៀតធ្វើឱ្យពិបាកដកដង្ហើម អស់កម្លាំងឬរងរបួសដោយហេតុណាមួយ។ ដើម្បីសុវត្ថិភាព គួរជួបជុំក្រុមគ្រួសារនៅផ្ទះ អាចមើលការប្រណាំងទូកតាមទូរទស្សន៍ និង ទទួលទានអាហារជុំគ្នា។ បើចង់ខានមិនបាន អ្នកអាចធ្វើការកក់សណ្ឋាគារដែលនៅទល់មុខកន្លែងកម្មវិធី ដូចជានៅមាត់ទន្លេ ហើយសម្រាកលម្ហែនៅទីនោះតែម្តង។ ឱកាសបុណ្យទានសណ្ឋាគារខ្លះក៏នឹងមានរៀបចំកម្មវិធីផងដែរ។ អ្នកអាចឆែកមើលមុនដើម្បីត្រៀមខ្លួន ត្រៀមឈុត រីករាយនឹងគេ។
២. ធ្វើអាហារញុំានៅផ្ទះ ឬ ទៅភោជនីយដ្ឋាន
ម៉ាក់ៗអាចណាត់មិត្តភក្តិឬក្រុមគ្រួសារមកជួបជុំគ្នា បង្កើតកម្មវិធីនៅផ្ទះក៏សប្បាយម្យ៉ាង។ តែបើចង់ឃើញគេឃើញឯង អាចឆ្ពោះទៅកាន់ភោជនីយដ្ឋានណាមួយដែលមានបរិយាកាសស្រស់ស្រាយ។ គួររក្សាការបរិភោគអាហារចម្អិនឆ្អិន និង ជាអាហារសម្បូរទៅដោយសារធាតុចិញ្ចឹម។ ជៀសវាងអាហារតាមដងផ្លូវ និង អាហារឆៅ។
៣. រក្សាទំនាក់ទំនងជាមួយគ្រូពេទ្យ
អំឡុងពេលបុណ្យទានជាពេលមួយដែលបង្កើតភាពរីករាយ និង អនុស្សាវរីយ៍។ តែយ៉ាងណាមិញ អ្នកត្រូវតែផ្តល់ភាពចម្បងទៅលើសុខភាព។ ដើម្បីសុវត្ថិភាព អ្នកត្រូវត្រៀមថ្នាំសង្កូវ រួមទាំងរបស់ប្រើប្រាស់ចាំបាច់ពេលមានអាសន្ន។ មួយវិញទៀត ត្រូវសួរគ្រូពេទ្យបញ្ជាក់ ថាតើពេលបុណ្យទាន គ្រូពេទ្យប្រចាំឬគ្រូពេទ្យណាខ្លះដែលនៅធ្វើការធម្មតា។ លើសពីនេះ ឆែកមើលមន្ទីរពេទ្យណាដែលនៅជិតៗ ត្រៀមក្រែងលោមានបញ្ហាភ្លាមៗ។ ចំណែកថ្នាំប្រចាំថ្ងៃ ត្រូវលេបឱ្យជាប់ជានិច្ច។
៤. រក្សាទម្លាប់ថែទាំសុខភាព
ទោះកម្មវិធីបុណ្យទានយូរៗមានម្តង អ្នកមិនត្រូវភ្លេចខ្លួនបោះបង់ទម្លាប់ថែទាំសុខភាពឡើយ។ អ្នកត្រូវទទួលទានអាហារជាប្រចាំ អាហារល្អចំពោះសុខភាព ផឹកទឹកឱ្យបានច្រើន និង គេងឱ្យបានគ្រប់គ្រាន់។ សូម្បីទម្លាប់សមាធិ និង ហាត់ប្រាណ ក៏ត្រូវបានរាប់បញ្ចូល។
៥. លេងខ្លួននឹងគេ
ថ្វីបើជាស្ត្រីពពោះ តែអ្នកនៅតែអាចលេងខ្លួនស្លៀកពាក់ស៊ីវិល័យដូចគេឯង។ គ្រាន់តែការស្លៀកពាក់ ត្រូវជ្រើសរើសខោអាវ ដែលរលុងស្រួលខ្លួន សាច់ក្រណាត់មានខ្យល់ចេញចូលល្អ រួមជាមួយស្ទីលស៊ីមេទ្រីនឹងកម្មវិធី។ ការលេងខ្លួនជាចំណែកមួយបង្កើតអនុស្សាវរីយ៍ ហើយវាថែមទាំងធ្វើឱ្យអារម្មណ៍ស្រស់ស្រាយ និង មានទំនុកចិត្តផងដែរ។
ជារួមមក ប៉ុន្មានចំណុចខាងលើនេះ សុទ្ធតែជាចំណែកក្នុងការថែទាំ ដើម្បីឱ្យម្តាយបានរីករាយក្នុងឱកាសបុណ្យទាន ស្របគ្នានឹងរក្សាបាននូវសុខភាពល្អ។ ចងចាំថាសុខភាពអ្នក និង កូនក្នុងផ្ទៃ ត្រូវតែមកមុនគេ។ ជូនពរអ្នកម្តាយគ្រប់រូបមានសុខភាពល្អ និង រីករាយជាមួយឱកាសបុណ្យអុំទូកនេះ!៕
