ថ្មីៗនេះ ស្រ្តីដែលជាថៅកែទុរេនម្នាក់នៅប្រទេសថៃ បានបាត់ខ្លួនឈឹងបង្កឱ្យមានការភ្ញាក់ផ្អើល និង ភ័យព្រួយពីសំណាក់គ្រួសារ និង មហាជន ដោយខ្លាចថាជាករណីចោរកម្មណាមួយ ព្រោះស្រ្តីរូបនេះមានពាក់មាសជាង ៨ តម្លឹងនៅជាប់ខ្លួនឯណោះ។
តាមព័ត៌មានបានឱ្យដឹងថា ស្រ្តីរូបនេះមានឈ្មោះថាចែកែវ អាយុ ៤៣ ឆ្នាំ ជាម្ចាស់តូបលក់ទុរេននៅផ្សារ Pho Wai ឃុំ Bang Kung ស្រុក Muang ខេត្ត Surat Thani ហើយបានបាត់ខ្លួនទៅតាំងពីថ្ងៃទី ១៧ ខែឧសភា ឆ្នាំ ២០២៥ កន្លងទៅម្ល៉េះ ដោយបានប្រាប់ប្អូនស្រីថាចេញពីលក់ទុរេនត្រឡប់ទៅផ្ទះ ហើយក៏បាត់ឈឹងតែម្តង។
យ៉ាងណាមិញ ក្រោយការតាមរកស្រាវជ្រាវរបស់ប៉ូលិស ចែកែវ ក៏ត្រូវបានគេរកឃើញនៅផ្ទះសាច់ញាតិនៅឯស្រុក Kanchanadit ហើយចំណែកទ្រព្យសម្បត្តិដែលនៅជាប់ខ្លួនទាំងប៉ុន្មានក៏មិនមានបាត់បង់អ្វីឡើយ។ ដោយឡែក ចែកែវ បានប្រាប់ប៉ូលិសឱ្យដឹងថា ខ្លួនមានបញ្ហាក្នុងគ្រួសារ ទើបគេចចេញមកនៅខាងក្រៅម្នាក់ឯងស្ងាត់ៗសិន ហើយក៏មិនចង់និយាយជាមួយនរណា គ្រាន់តែចង់សុំពេលសម្រួលអារម្មណ៍សិន បើបានល្អពេលណានឹងត្រឡប់ទៅវិញ៕
ប្រភព៖ Khaosod
