មុនក្លាយជាតារាល្បី James Ma មានក្តីស្រមៃចង់ចាប់អាជីពនេះ តែអ្វីៗប្រែប្រួលពេលជួបមនុស្សម្នាក់
តួឯកប្រុសភ្នែកតឹង James Ma គឺជាតារាសម្ដែងប្រុសម្នាក់ប្រចាំប៉ុស្ដិ៍លេខ ៣ ថៃ ដែលមានកេរ្តិ៍ឈ្មោះល្បីល្បាញ ហើយរាល់ស្នាដៃសម្តែងក្នុងរឿងជាច្រើនរបស់លោកជាមួយប៉ុស្ដិ៍ទូរទស្សន៍នេះ ក៏ងតែងតែផ្ទុះការគាំទ្រខ្លាំងពីមហាជនផងដែរ។
ងាកមកជីវិតឯកជនរបស់តារាប្រុសរូបនេះវិញ កំលោះភ្នែកតឹង James Ma បានទម្លាយពីក្ដីស្រមៃរបស់ខ្លួនមុនក្លាយជាតារាសម្ដែង ដោយពីមុនលោកគឺចង់ក្លាយជាកីឡាករវាយកូនហ្គោល តែមិននឹកស្មានអ្វីៗប្រែប្រួល លោកក៏បានក្លាយជាតារាសម្តែងទៅវិញ បន្ទាប់ពីបានជួបជាមួយអ្នកចាត់ការដំបូងរបស់ខ្លួន ពេលមករស់នៅប្រទេសថៃ។ ពិតណាស់ តារាប្រុស James Ma បាននិយាយថា ៖ «ដំបូងគិតថាមកប្រទេសថៃ គឺមករៀនវាយកូនហ្គោល តែពេលជួបជាមួយអ្នកចាត់ការដំបូង ស្រាប់តែនិយាយថាធ្វើអ្វីក៏បានដែរ ពេលនោះអ្នកចាត់ការក៏បានរុញចូលសិល្បៈ»។
បើត្រឡប់ក្រោយបន្តិចពីជីវិតរបស់តួឯកប្រុស James Ma មុនចូលសិល្បៈ តារាប្រុសរូបនេះគឺរស់នៅប្រទេសហុងកុងជាមួយគ្រួសារ ហើយក៏មកប្រទេសថៃ ព្រោះគិតថាអាចមានពេលវេលាច្រើនក្នុងការរៀនវាយកូនហ្គោល ទើបសម្រេចចិត្តមករស់នៅក្នុងប្រទេសថៃ។
ជាការពិតណាស់ ទោះមិនបានក្លាយជាកីឡាករវាយកូនហ្គោតាមក្ដីស្រមៃ តែ James Ma ក៏បានចំណាយពេលវេលាទំនេរពីការងារជាតារាសម្ដែង រៀនវាយកូនហ្គោលហើយក៏ធ្លាប់ចូលរួមប្រកួតរហូតទទួលបានជ័យជំន្នះផងដែរ៕
