ពិតណាស់បងប្អូនដែលនិយមតាមដានហុងស៊ុយ កាលណាបើបានឮពាក្យថា «ឆុង» តែងតែខ្លាចរអាជាមួយឥទ្ធិពលនៃពាក្យនេះ ដែលតាមពិតទៅវាពុំមានអ្វីគួរឱ្យខ្លាចនោះឡើយ តែគប្បីត្រូវចេះរៀនត្រៀមចិត្ត ប្រឈមមុខជាមួយរឿងរ៉ាវដែលនឹងត្រូវកើត។
ជាក់ស្ដែង នៅថ្ងៃទី ២០ ខែតុលា ឆ្នាំ ២០២៥ លោកគ្រូចិនសែម៉ុង ដែលជាគ្រូហុងស៊ុយបែបវិទ្យាសាស្ត្រដ៏មានប្រជាប្រិយភាព បានចែករំលែកកុំឱ្យបងប្អូនព្រួយបារម្ភរឿងឆុងខ្លាំងពេក ដោយលោកគ្រូបានបញ្ជាក់ឱ្យបានដឹងថា ៖ «ការពិតទៅឆុងឥតមានអ្វីគួរឱ្យខ្លាចទេ ឆុង គឺគ្រាន់តែជាឥទ្ធិពលមួយ ពីឆ្នាំមួយសង្កត់ឆ្នាំមួយ។ ឧទាហរណ៍ថា ឆ្នាំ ២០២៦ ខាងមុខគឺឆ្នាំសេះ អ៊ីចឹងអ្នកកើតឆ្នាំសេះគេហៅថាជាន់ឆ្នាំ ដូច្នេះរាសីគាត់ យីអ៊ុនគាត់ ត្រូវបានកំណត់ដោយព្រំបន្ទាត់មួយដែលមិនអាចឡើងខ្ពស់បាន ឬក៏ពិបាកនៅក្នុងការឡើង ប៉ុន្តែនៅមានឆ្នាំឆុងផ្សេងទៀត ដូចជាឆ្នាំជូត ឆ្នាំអ្វីផ្សេងទៀត ឆុងក្នុងកម្រិតមួយដែលអាចនិយាយបានថាមានមុខងាររបស់គេ»។
លោកគ្រូបានបន្តថា ៖ «ប្រភេទឆុង ដែលយើងតែងតែឃើញជារួមតែងតែមាន ឆុងជាន់ឆ្នាំ ឆុងបែកបាក់ ឆុងគ្រោះថ្នាក់ ឆុងលាបពណ៌ គឺសុទ្ធតែជាឆុងដែលឧស្សាហ៍ពេញនិយមផ្សព្វផ្សាយតាមរយៈគ្រូហុងស៊ុយបរទេសជាដើម»។ មកដល់ចំណុចនេះ លោកគ្រូចិនសែ ម៉ុង បានលើកទឹកចិត្តឱ្យបងប្អូនធ្វើចិត្តឱ្យត្រជាក់ កុំខ្លាចឆុង ប៉ុន្តែអ្នកទាំងអស់គ្នាគួរតែហ៊ានប្រឈមមុខជាមួយនឹងរឿងរ៉ាវដែលវាត្រូវកើត ប្រសិនបើអ្នកទាំងអស់គ្នានៅក្នុងឆ្នាំដែលឆុង។ លោកគ្រូបានបន្តថា «ឆុង» យើងអាចប្រើប្រាស់វិធី ៣ យ៉ាងដែលលោកគ្រូតែងចែករំលែក គឺពាក់ព័ន្ធនឹងការការពារ ពាក់ព័ន្ធជាមួយនឹងការគេច និង ការបន្សាបឆុង៕
