រៀបការជាង ១ ឆ្នាំ បានកូនម្នាក់ហើយ ភរិយា ជា សុជាតិ ទើបទម្លាយរឿងមួយធ្លាប់និយាយនឹងម្តាយក្មេកកាលគាត់នៅរស់

បើគិតមកដល់ពេលនេះ រយៈពេលប្រមាណ ១ ឆ្នាំកន្លះមកហើយ ដែលលោក ជា សុជាតិ សមាជិកក្រុមចម្រៀងក្មេងខ្មែរ និង អតីតអ្នកគ្រប់គ្រង អ្នកនាង រឹម លក្ស្មី បានចាប់ដៃគ្នារៀបការសាងគ្រួសារយ៉ាងមានសុភមង្គល។

ក្រោយរៀបការសាងគ្រួសារយ៉ាងមានសុភមង្គលនោះ មកដល់ពេលនេះ លោក ជា សុជាតិ និង ភរិយា ទទួលបានចំណងដៃកូនប្រុសមួយរូបហើយ ដោយកូនប្រុសរបស់តារាចម្រៀងរ៉េបរូបនេះមានអាយុ ៨ ខែហើយ។

យ៉ាងណាមិញ ថ្មីៗនេះ អ្នកលេងបណ្តាញសង្គមហ្វេសប៊ុកបានចាប់អារម្មណ៍នឹងសារអមរូបភាពមួយរបស់ភរិយាលោក ជា សុជាតិ គឺអ្នកនាង រឹម លក្ស្មី ជាមួយនឹងម្តាយក្មេក កាលម្តាយក្មេកនៅមានជីវិត ។ អ្វីដែលចាត់ទុកថាជារឿងទេវតាចារទុកមកនោះ អ្នកនាង រឹម លក្ស្មី បានឱ្យដឹងថា ពេលនោះអ្នកនាងធ្លាប់សន្យានឹងមើលថែលោក ជា សុជាតិ ថែមទៀតផង។

ខ្លឹមសារទាំងស្រុងនោះដែរ អ្នកនាង រឹម លក្ស្មី ភរិយាលោក ជា សុជាតិ បានរៀបរាប់ថា ៖ «ជានិស្ស័យ ឬ ជាវាសនា? ខ្ញុំធ្លាប់ប្រាប់អ៊ំស្រីថា «កុំបារម្ភអ៊ំ! ខ្ញុំនឹងជួយមើលថែកូនប្រុសអ៊ំឱ្យ» ហើយពេលនេះកូនប្រុសអ៊ំគឺជាឪពុករបស់កូនខ្ញុំ។ រូបថតតែមួយគត់ ដែលមានជាមួយម៉ាក់ក្មេក»៕