បើរំឭកដល់បទចម្រៀងចាស់ៗនៅក្នុងផលិតកម្ម រស្មីស្ទឹងសង្កែ ដែលល្បីៗរួមមានបទ «កុំធ្វើយ៉ាងហ្នឹង», បទ «បេះដូងប្រមឹក» និង បទ «មើលមនុស្សខុស» អ្នកគាំទ្រនិយមស្តាប់ចម្រៀងកាលពីជាង ១០ ឆ្នាំ មុនច្បាស់ជាស្គាល់ម្ចាស់បទជាក់ជាមិនខាន គឺអ្នកនាង អ៊ុង វល្ខណ៍ទេវី។
កាលនោះ គេចាំបានថា អ្នកនាង អ៊ុង វល្ខណ៍ទេវី បានឈរឈ្មោះក្នុងនាមជាតារាចម្រៀងកំពុងពេញល្បីខ្លាំង នៅជំនាន់រួមគ្នានឹងតារាចម្រៀង សួស សេងសប្តាហ៍, លោក សេន រ៉ានុត និង លោក សាន ផានិត ជាដើម។
ងាកមកបច្ចុប្បន្នវិញ ក្រោយពីបាត់មុខក្នុងវិថីសិល្បៈប្រមាណជាង ១០ ឆ្នាំ ហើយនោះ អ្នកនាង អ៊ុង វល្ខណ៍ទេវី មិនដែលបានបង្ហាញវត្តមានក្នុងកម្មវិធីអ្នកសិល្បៈនោះឡើយ។ ក្នុងនោះ បើក្រឡេកទៅមើលបណ្តាញសង្គមរបស់អ្នកនាងវិញ ភាគច្រើនឃើញថា អតីតតារាចម្រៀងស្រីរូបនេះ ចេញចូលក្រៅប្រទេសញឹកញាប់។
ម្យ៉ាងវិញទៀត អ្វីដែលគួរឱ្យចាប់អារម្មណ៍ បើតាមការបង្ហាញពីការរស់នៅប្រចាំថ្ងៃនោះ អ្នកនាង អ៊ុង វល្ខណ៍ទេវី សព្វថ្ងៃជាមន្ត្រីនៃក្រសួងសេដ្ឋកិច្ច និង ហិរញ្ញវត្ថុ៕
