ប្លែកណាស់! នៅជប៉ុន តុក្កតាជាង ៥ ម៉ឺន ត្រូវម្ចាស់យកមកទុកក្នុងវត្តមួយហើយធ្វើបុណ្យស/ពឱ្យរាល់ឆ្នាំ ដើម្បីឧទ្ទិសកុសលផលបុណ្យ

ធ្លាប់តែឃើញគេធ្វើពិធីបុណ្យសពសម្រាប់មនុស្ស តែមានដឹងទេមានវត្តមួយនៅឯប្រទេសជប៉ុន បានរៀបចំពិធីបុណ្យសពឱ្យតុក្កតាជារៀងរាល់ឆ្នាំ ដែលមកទល់ពេលនេះមានតុក្កតាជាង ៥ ម៉ឺន ចាក់គរពេញវត្ត។

តាមព័ត៌មានបានឱ្យដឹងថា វត្តមួយនេះឈ្មោះ វត្ត Shinguchi ស្ថិតនៅក្នុងខេត្ត Osaka។ វត្តនេះបានចាប់ផ្តើមធ្វើពិធីបុណ្យសពឱ្យតុក្កតា និង របស់លេងតាំងពី ២០ មុនមកម្ល៉េះ ដែលភាគច្រើតុក្កតាទាំងនេះសុទ្ធតែជារបស់លេងកាលពីនៅក្មេងៗរបស់មនុស្សជាច្រើន ហើយពួកគេមិនដាច់ចិត្តបោះចោល ទើបបាននាំគ្នាយកមកចូលរួមធ្វើបុណ្យបែបនេះ។

ក្នុងនោះ តម្រូវឱ្យមានការបង់ប្រាក់ចំនួន ៣០០០ យ៉េន ចំពោះតុក្កតាមួយ ហើយម្ចាស់អាចមកចូលរួមដោយផ្ទាល់ ឬ ផ្ញើតុក្កតាតាមប្រៃសនីយ៍ក៏បាន។ ពិធីនេះបានរៀបចំដូចពិធីបុណ្យសពទូទៅដែរ គឺមានព្រះសង្ឃសូត្រធម៌ ហើយអ្នកចូលរួមអាចថ្វាយធូបផ្កា ឧទ្ទិសបុណ្យកុសល ឬក៏អាចសរសេរសារលាគ្នាលើតុក្កតាក៏បានដែរ។

យ៉ាងណាមិញ កាលពីរៀបចំពិធីក្នុងឆ្នាំដំបូង មានតុក្កតាតែ ៣០០០ តុក្កតាប៉ុណ្ណោះ ដែលត្រូវគេយកចូលរួម ហើយកាលពីឆ្នាំ ២០២៤ កន្លងទៅ ចំនួនតុក្កតាបានកើនឡើងរហូតដល់ទៅជាង ៥០ ០០០ តុក្កាឯណោះ។ ដោយឡែក ចំពោះលុយដែលទទួលបានពីពិធីនេះទាំងប៉ុន្មាន នឹងត្រូវគេយកទៅបរិច្ចាគក្នុងការអភិវឌ្ឍន៍សុខុមាលភាពក្នុងតំបន់៕

ប្រភព៖ soranews24